شۆڕش ئیسماعیل: هەڵبژاردەكەمان سەرخستنی لیستی شەهیدانە

.

لێپرسراوی دەزگای هەڵبژاردن رایگەیاند: بانگەشەی هەڵبژاردن بۆ لیستی (١٠٥)ی یەكێتی قۆناغ بەقۆناغ بەڕێوەدەچێت و جگە لە سەركەوتنی گەورەش هیچ بژاردەیەكی ترمان لەبەردەست نییە، بۆیە بۆ ئەم هەڵبژاردنە ئەركمان قورس دەبێت.

لە چوارچێوەی بەڕێوەچوونی بانگەشەی هەڵبژاردن، پێشنیوەڕۆی ئەمڕۆ شەممە (١٥/٩/٢٠١٨)، بە سەرپەرشتی هەڤاڵ شۆڕش ئسیماعیل لێپرسراوی دەزگای هەڵبژاردن و ئەندامی مەكتەبی سیاسی یەكێتیی نیشتیمانیی كوردستان، كۆبوونەوەی دەزگای هەڵبژاردن و لێپرسراوی بەشی هەڵبژاردنی مەڵبەندەكانی (ی.ن.ك)، بەرێوەچوو، بۆ گفتوگۆكردن لەسەر پرۆسەی هەڵبژاردن و قۆناغەكانی بانگەشەی هەڵبژاردن.

شۆڕش ئسیماعیل رایگەیاند: بۆ ئەم هەڵبژاردنە ئەركی (ی.ن.ك) قورس دەبێت و جگە لە تۆماركردنی گەورەترین سەركەوتنیش بۆ لیستی (١٠٥) لیستی حزبی شەهیدان و "سەرۆك مام جەلال" هیچ بژاردەیەكی ترمان لەبەردەست نابێت.

"شۆڕش ئسیماعیل" رایگەیاند: لەم هەڵبژاردنە هیچ كادیر و ئەندامێكی یەكێتی لەناو ئۆرگانەكان بەبێ‌ ئەرك نامێننەوە و هەموومان كاردەكەین بۆ سەرخستنی لیستی شەهیدان، بەشی هەڵبژاردنی مەڵبەندەكانیش رۆڵی تەواویان دەبێت لە پرۆسەكە ، "شۆڕش ئسیماعیل" وتیشی " یەكێتی جەخت دەكاتەوە لەسەر بەرێوەچوونی هەڵبژاردنێكی پاك و بێگەرد و دوور لە توندوتیژی ، پێداگریش دەكات لەسەر هەڵوێستەكانی پێشووی، كە لە هەڵبژاردنی ٣٠-ی ئەیلول، سیمایەكی دیموكراسی پیشانی كۆمەڵگەی نێودەوڵەتی و رێكخراوەی نێودەوڵەتییەكان بدرێت.

لێپرسراوی دەزگای هەڵبژاردنی (ی.ن.ك) راشیگەیاند: یەكێتی هەموو رێكارێكی مەدەنی و یاسایی دەگرێتە بەر بۆ بەدەستهێنانی زۆرترین دەنگ كە نوێنەرایەتی زۆرینەی كۆمەڵانی خەڵكی كوردستان بكات لە پەرلەمان و حكومەت بۆ چوارساڵی داهاتوو.

لە كۆبوونەوەكەدا جارێكی تر جەختكرایەوە لەسەر، رۆڵی بەشی هەڵبژاردنی مەڵبەندەكان لە سەرخستنی بانگەشەی هەڵبژاردن و كۆكردنەوەی زۆرترین دەنگ بۆ لیستی (١٠٥)ی یەكێتیی نیشتیمانیی كوردستان.

PUKmedia تایبەت