زریانێكی مه‌ترسیدار هه‌ڕه‌شه‌ له‌ سێ وڵاتی ئاسیا ده‌كات

.

هه‌زاران دانیشتووی فلیپین، له‌ مه‌ترسیی گه‌یشتنی زریانی تایفون، ماڵه‌كانیان جێده‌هێڵن، به‌هۆی ئه‌و زریانه‌وه‌، ژیانی چوار ملیۆن دانیشتووی باكووری ئه‌و وڵاته‌ له‌ مه‌ترسیدایه‌، حكومه‌تیش، سه‌رباز و هێزه‌كانی فریاكه‌وتن له‌ گشت هه‌رێمه‌كاندا  بۆ هه‌ر حاڵه‌تێكی نه‌خوازراو ده‌خاته‌ ئاماده‌باشیه‌وه‌.

زریانی تایفون كه‌ به‌ به‌هێزترین زریان ناسراوه‌و له‌ پله‌ی پێنجه‌مدایه‌و خێرایی "با" كه‌ی 285 كیلۆمه‌تره‌ له‌ سه‌عاتێكدا، به‌م پێیه‌ش خێراییه‌كه‌ی به‌ نزیكه‌یی سێ هێنده‌ی زریانی فلۆرێنسه‌ كه‌ له‌ ئێستادا كه‌ناراوه‌كانی ویلایه‌ته‌كانی ئه‌مریكای گرتووه‌ته‌وه‌.

تایفون مانگهوت له‌ خۆرهه‌ڵات و باكووری ئاسیاوه‌ له‌ ناوچه‌كه‌ نزیك ده‌بێته‌وه‌ و پێشبینی ده‌كرێت له‌ ڕۆژی شه‌ممه‌دا بگاته‌ دوورگه‌ی لوزان له‌ فلیپین.

مانگهوت گه‌شتووه‌ته‌ دوورگه‌كانی (گوام و مارشاڵ) له‌ زه‌ریای هێمن و بووه‌ته‌ هۆی دروستبوونی لافاوێكی به‌ربڵاو و نه‌مانی كاره‌با له‌ ناوچه‌كاندا.

له‌ فلیپین زریانه‌كه‌ مه‌ترسییه‌كی زۆری دروستكردووه‌ به‌ شێوه‌یه‌ك كه‌ پێشبینی ده‌كرێت وه‌ك زریانه‌كه‌ی (هه‌ییان)ی ساڵی 2013 كاریگه‌ری هه‌بێت كه‌ زیانێكی زۆری به‌ وڵاته‌كه‌ گه‌یاند و بووه‌ هۆی مردنی 6 هه‌زار هاووڵاتی.

لانیلین كاریلۆی، وته‌بێژی ڕێكخراوی ڕوانگه‌ی جیهانی له‌ لێدوانێكیدا رایگه‌یاند: "ئێمه‌ خۆمان بۆ خراپترین ره‌وش ئاماده‌ كردووه‌." 

وتیشی: "بیرو باوه‌ڕێكی وا هه‌یه‌ كه‌ ده‌كرێت ئه‌م زریانه‌ هاوشێوه‌ی زریانه‌كانی هه‌ییان و هه‌یما بێت كه‌ له‌ ڕابردوودا زیانێكی زۆری به‌ ناوچه‌كه‌ گه‌یاندووه‌.

هه‌ر له‌وباره‌یه‌شه‌وه‌، CNN ی به‌ریتانی ئه‌وه‌ی ڕوونكردووه‌ته‌وه‌ كه‌ زریانی هه‌یما له‌ ساڵی 2016 دا بووه‌ هۆی خاپووركردنی 14 هه‌زار ماڵ و زیانپێگه‌یاندنی 50 هه‌زاری تر.

(لیژنه‌ی نه‌ته‌وه‌یی بۆ به‌ڕێوه‌بردن و كه‌مكردنه‌وه‌ی مه‌ترسیی كاره‌ساته‌ سروشتییه‌كان) ئه‌وه‌ی ڕاگه‌یاندووه‌: مه‌ترسیی زریانه‌كه‌ ده‌گاته‌ ئه‌و ناوچانه‌ی 125كم له‌ نیوه‌تیره‌ی تایفونه‌وه‌ دوورن و ئه‌مه‌ش وا ده‌كات كه‌ 4.3 ملیۆن كه‌س رووبه‌ڕووی زریانه‌كه‌ ببنه‌وه‌ كه‌ 824.100 له‌و كه‌سانه‌ له‌ چینی هه‌ژارن، بۆ ئه‌و مه‌به‌سته‌ش، پێشوه‌خت خۆراك و كه‌ره‌سته‌ی پێویست له‌و ناوچانه‌دا له‌لایه‌ن حكومه‌ته‌وه‌ بۆ هاووڵاتان ئاماده‌كراوه‌.

PUKmedia ئاژانسه‌كان