یه‌كێتی به‌شێوازێكی مه‌ده‌نییانه‌ بانگه‌شه‌ ده‌كات

.

وته‌بێژی ده‌زگای هه‌ڵبژاردنی یه‌كێتیی نیشتمانیی كوردستان راده‌گه‌یه‌نێت، وه‌ك یه‌كێتی له‌ بانگه‌شه‌دا به‌رنامه‌و په‌یامی یه‌كێتی ده‌گه‌یه‌نین و به‌هیچ شێوه‌یه‌ك ناچینه‌ ململانێی هیچ لایه‌نێك یان شه‌خسی ناوهیچ لایه‌نێكی تر.  

د. بڕیار ره‌شید وته‌بێژی ده‌زگای هه‌ڵبژاردنی یه‌كێتیی نیشتمانیی كوردستان ئه‌مڕۆ 12-9-2018، به‌ PUKmedia ی راگه‌یاند: وه‌ك یه‌كێتیی نییشتمانیی كوردستان وه‌ك جاره‌كانی پێشوو بانگه‌شه‌یه‌كی ئارام به‌ڕێوه‌ده‌به‌ین و له‌ بانگه‌شه‌شدا به‌رنامه‌و په‌یامی یه‌كێتی ده‌گه‌یه‌نین و به‌هیچ شێوه‌یه‌ك ناچینه‌ ململانێی هیچ لایه‌نێك یان شه‌خسی ناوهیچ لایه‌نێكی تر، بۆیه‌ نامانه‌وێت له‌ رێڕه‌وی راسته‌قینه‌ی كاره‌كانمان لابده‌ین كه‌ ئه‌ویش خزمه‌تكردنی هاووڵاتییانه‌.

راشیگه‌یاند: وه‌ك ده‌زگای هه‌ڵبژاردن له‌سه‌ره‌تای ده‌ستپێكردنی بانگه‌شه‌وه‌ لیژنه‌ی تایبه‌تیمان پێكهێناوه‌، تا بگه‌ڕێت و رێنمایی بدات له‌ چ شوێنێكدا پۆسته‌ر هه‌ڵبواسرێت و له‌ چ شوێنێكدا هه‌ڵنه‌واسرێت، ئه‌گه‌ریش كاندیدێك پۆسته‌ری له‌ شوێنێك هه‌ڵواسیبێت كه‌ پێچه‌وانه‌ی رێنماییه‌كانی كۆمسیۆن و شاره‌وانی بێت، ده‌ستبه‌جێ ئاگادارمان كردوه‌ته‌وه‌و پێمان لاداوه‌ تاكو له‌ شوێنی تایبه‌تی و گونجاو دایبنێت.

 له‌باره‌ی پێشێلكارییه‌كان و دڕاندنی پۆسته‌ره‌كانی لیستی 105 ی یه‌كێتی، د. بڕیار وتی: وه‌ك ده‌زگای هه‌ڵبژاردن له‌رێگه‌ی لیژنه‌ تایبه‌تمه‌نده‌كانمانه‌وه‌ له‌ شاره‌كان ده‌گه‌ڕێین و زانیاری و پێشێلكارییه‌كان به‌ دیكۆمێنته‌وه‌ كۆده‌كه‌ینه‌وه‌، دواتر به‌ راپۆرتی تایبه‌ت راده‌ستی كۆمسیۆنی باڵای هه‌ڵبژاردن و راپرسی هه‌رێمی ده‌كه‌ین و ئه‌وان دواتر مامه‌ڵه‌ی یاسای خۆیانی له‌گه‌ڵ ده‌كه‌ن.

PUKmedia زانیار مه‌جید