زه‌ریف ره‌خنه‌ له‌ وڵاتانی ئه‌وروپا ده‌گرێت

.

وه‌زیری ده‌ره‌وه‌ی ئێران له‌باره‌ی رێككه‌وتننامه‌ ئه‌تۆمییه‌كه‌وه‌ ره‌خنه‌ له‌ وڵاتانی ئه‌وروپا ده‌گرێت و رایده‌گه‌یه‌نێت: وڵاتانی ئه‌وروپا ھیچ ھه‌نگاوێكی پراكتیكییان نه‌ناوه‌.

ئاژانسه‌كانی هه‌واڵ ئه‌مڕۆ 19-8-2018، بڵاویانكرده‌وه‌ محه‌مه‌د جه‌واد زه‌ریف وه‌زیری ده‌ره‌وه‌ی ئێران ره‌خنه‌ی ئاڕاسته‌ی وڵاتانی ئه‌وروپا كردووه‌و له‌وباره‌یه‌وه‌ رایگه‌یاندوه‌: له‌دوای كشانه‌وه‌ی ئه‌مریكا له‌ رێككه‌وتننامه‌ ئه‌تۆمیه‌كه‌، ئه‌وروپا ته‌نھا ھه‌ڵوێستی ده‌ربڕیوه‌و ھیچ ھه‌نگاوێكی پراكتیكی نه‌ناوه‌ بۆ به‌جێگه‌یاندنی به‌ڵێنه‌كانیان سه‌باره‌ت به‌ مانه‌وه‌ له‌و رێككه‌وتنه‌دا.

وه‌زیری ده‌ره‌وه‌ی ئێران راشیگه‌یاندوه‌: ئه‌وروپیه‌كان چه‌ندین پێشنیاریان كردووه‌ و له‌ بواری مامه‌ڵه‌ی نه‌وتی و بانكیه‌كانیشدا چه‌ند ھه‌نگاوێكیان ناوه‌، به‌ڵام ھه‌نگاوه‌كان وه‌ك پێویست نه‌بوون و له‌ڕاستیدا ئه‌و ھه‌نگاوانه‌ زیاتر ده‌ربڕینی ھه‌ڵوێست بوون نه‌ك ھه‌نگاوی كرداری.  دوای ئه‌وه‌ی ئیداره‌كه‌ی دۆناڵد تره‌مپ سه‌رۆكی ئه‌مریكا، بڕیاری كشانه‌وه‌ی له‌ رێككه‌وتننامه‌ ئه‌تۆمییه‌كه‌دا، وڵاتانی ئه‌وروپا، به‌تایبه‌ت به‌ریتانیاو ئه‌ڵمانیا و فه‌ڕه‌نسا جه‌ختیانكرده‌وه‌ له‌سه‌ر پابه‌ندبوون به‌و رێككه‌وتنه‌و به‌ڵێنیاندا كۆمپانیا ئه‌وروپیه‌كان ھان بده‌ن كه‌ ھاوكاریی ئابووری له‌گه‌ڵ ئێراندا بكه‌ن.

PUKmedia ئاژانسه‌كان