قائیمقامی شەنگال: بۆردومانەكەی شلۆ بەئاگاداری عیراقە

.

قائیمقامی قەزای شەنگال رایدەگەیەنێت بۆردومانكردنی ناوچەی شلۆی شەنگال بەئاگاداری حكومەتی عیراقەوەو بەپێی زانیارییەكانیشیان بۆردومانەكە زیانی گیانی لێكەوتۆتەوە.

مەحما خەلیل قائیمقامی قەزای شەنگال بە PUKmediaی راگەیاند: فڕۆكەكان بۆردومانی دەروازەی گەلی شلۆیان كردوە كە دەكەوێتە رۆژئاوای قەزای شەنگال، ناوچەكەش هێزەكانی یەبەشەی لێیە.

وتیشی: تائێستا هیچ زانیارییەكمان نیە لەسەر ئەو فڕۆكانەی بۆردومانی ناوچەكەیان كردوە، بەڵام بۆردومانەكە بەئاگاداری حكومەتی عیراق كراوە.

قائیمقامی قەزای شەنگال ئەوەشی وت: بەپێی ئەو زانیارییە سەرەتاییانەی پێمان گەیشتوە، بۆردومانەكە زیانی گیانی لێكەوتۆتەوە، بەڵام نەزانراوە كە سەربازییە یان كەسانی مەدەنین.

لای خۆشیەوە مەزڵوم شەنگالی، فەرماندەی گشتی یەكینەكانی بەرخۆدانی شەنگال (یەبەشە) بە PUKmediaی راگەیاند: ئەو فڕۆكانەی ناوچەی شەلۆی شەنگالیان بۆردومان كردوە فڕۆكەی توركیان و ئەو كاروانەشی بەر بۆردومانەكە كەوتوون سەر بەهێزەكانیان نەبووە، بەڵكو سەر بەئەنجومەنی مەدەنی شلۆ بوون.

PUKmedia تایبەت