هاووڵاتییانی توركیا پێچه‌وانه‌ی داواكه‌ی ئه‌ردۆگان دۆلار ده‌كڕن

.

دوای داواكه‌ی ئه‌ردۆگان بۆ وازهێنان له‌ دۆلار، هاووڵاتییانی توركیا زیاتر ده‌ستیانكرد به‌ كڕینی دۆلار.

دوای ئه‌وه‌ی ره‌جه‌ب ته‌یب ئه‌ردۆگان سه‌رۆك كۆماری توركیا له‌ بانگه‌وازێكیدا داوای له‌ هاه‌ووڵاتییان وڵاته‌كه‌ی كرد واز له‌ مامه‌ڵه‌كردن به‌ دۆلار بهێنن و ته‌نها مامه‌ڵه‌ به‌ پاره‌ی لیره‌وه‌ بكه‌ن، به‌ پێچه‌وانه‌ی ئه‌وه‌وه‌ به‌رده‌م بانكه‌كانی توركیا پڕبوون له‌ خه‌ڵك بۆ كڕینی دراوی دۆلار.

ئه‌مڕۆ 11-8-2018، ره‌جه‌ب ته‌یب ئه‌ردۆگان سه‌رۆك كۆماری توركیا له‌ بانگه‌وازێكیدا بۆ هاووڵاتییانی توركیا له‌ ویلایه‌تی بایبورت-ی باكوری رۆژهه‌ڵاتی ئه‌و وڵاته‌، داوای كرد خه‌ڵك واز له‌ دراوی دۆلار بهێنن و ته‌نها مامه‌ڵه‌ به‌ دراوی لیره‌وه‌ بكه‌ن، به‌ڵام هه‌ر دوای ئه‌و بانگه‌وازه‌ هه‌زاران هاووڵاتی ئه‌و وڵاته‌ له‌به‌رده‌م بانكه‌كانی ئه‌و وڵاته‌ ریزیان به‌ست بۆ كڕینی دۆلار .

به‌هۆی خراپبوونی په‌یوه‌ندییه‌كانی توركیا له‌گه‌ڵ ئه‌مریكا رۆژ به‌رۆژ لیره‌ی توركی به‌های به‌رامبه‌ر دۆلار له‌ده‌ستده‌دات و له‌ ئێستاشدا لیره‌ی توركی به‌ڕێژه‌یه‌كی زۆر به‌های به‌رامبه‌ر دۆلاری ئه‌مریكی له‌ده‌ستداوه‌، ئه‌وه‌ش پشێوی و شڵه‌ژانی زۆری خستووه‌ته‌ نێو بازاڕی ئه‌و وڵاته‌وه‌و به‌شێكی زۆریش له‌ بازرگان و خاوه‌نكاره‌كانی ئه‌و وڵاته‌ زه‌ره‌رمه‌ندبوون و زیانی زۆر گه‌وره‌ش به‌ ئابوری ئه‌و وڵاته‌ كه‌وتووه‌.

PUKmedia سكای نیوز العربیه‌