ژنه‌ ئه‌ڵمانییه‌كی داعش دوای گه‌ڕانه‌وه‌ی بۆ وڵاته‌كه‌ی ده‌ستگیرده‌كرێت

.

ژنه‌ ئه‌ڵمانییه‌كی داعش دوای گه‌ڕانه‌وه‌ی بۆ ئه‌ڵمانیا رۆژی 26-7-2018 ده‌ستگیركرا

ده‌ڵێن له‌ قسه‌كانیدا وتویه‌تی: بۆ خزمه‌تی خوا له‌گه‌ڵ ڕێكخراوی تیرۆرستی ده‌وڵه‌تی ئیسلامیدا كاریكردووه‌و له‌ كۆتایی نیسانی ئه‌مساڵدا گه‌ڕاوه‌ته‌وه‌ بۆ ئه‌ڵمانیاو دواتر ده‌ستگیركراوه‌.

به‌م سه‌ره‌تایه‌ كه‌ناڵی ره‌سمی ئه‌ڵمانیا ARD له‌ به‌رنامه‌ی هه‌واڵی "تاگس شاو"دا ئاشكرایكرد "سابینا ئولریكی" ژنه‌ ته‌مه‌ن 31 ساڵی ئه‌ڵمانی له‌لایه‌ن داواكاری گشتی "كالسره‌"ـه‌وه‌ به‌تۆمه‌تی ئه‌ندامێتی له‌ ڕێكخراوی تیرۆرستی ده‌وڵه‌تی ئیسلامیدا فه‌رمانی گرتنی بۆ ده‌رچووه‌.

ئه‌م تۆمه‌تباره‌ له‌ كانونی یه‌كه‌می 2013ـه‌وه‌ دوای ئه‌وه‌ی بووه‌ به‌ ئیسلام چوه‌ته‌ سوریاو به‌پێی زانیارییه‌كانی ئه‌ڵمانیا ده‌ستبه‌جێ له‌ناو ڕیزه‌كانی داعشدا ده‌ستبه‌كار بووه‌و ژیانی هاوسه‌رگیری له‌گه‌ڵ به‌رپرسێكی داعشدا پێكهێناوه‌و دوو منداڵی لێیبووه‌.

به‌پێی زانیارییه‌كانی نوسینگه‌ی داواكاری گشتی فیدراڵی، خۆی و منداڵه‌كانی مانگانه‌ بڕی 100 دۆلار هاوكارییان له‌ داعش وه‌رگرتووه‌.

له‌و ماوه‌یه‌شدا كه‌ له‌ ڕیزه‌كانی داعشدا بووه‌ به‌ شێوه‌یه‌كی ئه‌وه‌نده‌ چالاك كاریكردووه‌ ته‌نانه‌ت ئاماده‌یی پیشانداوه‌ به‌ پشتوێنی بۆمبرێژكراوه‌وه‌ هێرش بكاته‌سه‌ر ڕكابه‌ره‌كانیان.

هه‌روه‌ك له‌ ڕاگه‌یاندنی داواكاری گشتیدا هاتووه‌، ئه‌و تۆمه‌تباره‌ وه‌ك ڕاگه‌یاندكارێكی چالاك و نووسه‌رێكی كارامه‌ كاریكردووه‌و وێنه‌ی پروپاگه‌نده‌ی چه‌ك و تۆقاندنی بڵاوكردۆته‌وه‌و ئاشكراشی كردووه‌ كه‌ هاوكاری زۆری داعشی كردووه‌ له‌وباره‌یه‌وه‌.

ڕاپۆرته‌كه‌ی كه‌ناڵی ره‌سمی ئه‌ڵمانیا ده‌ڵێت: ئه‌م ژنه‌ داعشه‌ ئه‌ڵمانیه‌ دوای ئه‌وه‌ی كه‌ هاوسه‌ره‌كه‌ی له‌ كانونی یه‌كه‌می 2016 دا ده‌كوژرێت، وه‌ك لێكۆڵینه‌وه‌كان ده‌ڵێن ڕه‌نگه‌ هاوسه‌رگیری تری كردبێته‌وه‌! ئه‌م تۆمه‌تباره‌ش له‌ ئه‌یلولی 2017دا له‌لایه‌ن ئاسایسی كوردستانه‌وه‌ به‌ چه‌كه‌وه‌ له‌گه‌ڵ چه‌ند ژنێكی تری داعشدا له‌كاتی ڕزگاركردنی موسڵدا ده‌ستگیر ده‌كرێت و له‌ 26 ی نیسانی 2018 دا ده‌گه‌ڕێته‌وه‌ ئه‌ڵمانیاو ئێستا له‌ زیندان ڕاگیراوه‌.

له‌ هه‌واڵه‌كه‌دا ورده‌كاری گرتنه‌كه‌ی باسنه‌كراوه‌و باسی ئه‌وه‌ش نه‌كراوه‌ چۆن ئازادكراوه‌و چۆن گه‌ڕاوه‌ته‌وه‌ ئه‌ڵمانیا، هه‌مانكات شپیگل ئۆنلاین و دۆیچه‌ ڤیللـه‌ش ئاماژه‌یان به‌وه‌ داوه‌ ده‌زگا ئه‌منیه‌كانی ئه‌ڵمانیا به‌تایبه‌تی نوسینگه‌ی داواكاری گشتی هه‌موو تواناكانی خۆی خستۆته‌گه‌ڕ بۆ ده‌ستگیركردنی 200 كه‌س له‌و ژنانه‌ی به‌ره‌و سوریاو عێراق رۆشتوون به‌ مه‌به‌ستی په‌یوه‌ندیكردن به‌ داعشه‌وه‌، چونكه‌ یاسای ئه‌ڵمانی پێیوایه‌ په‌یوه‌ندیكردن و ئه‌ندامێتی له‌ رێكخراوی تیرۆرستیدا تاوانه‌و ئه‌و ژنانه‌ش له‌ده‌ستی یاسا ڕزگاریان نابێت و به‌سزای خۆیان ده‌گه‌ن، ده‌زگا ئه‌منیه‌كانی ئه‌ڵمانیاش به‌گشتی له‌مباره‌یه‌وه‌ ڕێنماییان ده‌ركردووه‌.

PUKmedia  شیهاب عوسمان - ئه‌ڵمانیا