كاركردن به‌ یاسای ئه‌نجومه‌نی نوێنه‌ران راگیرا

.

دادگای باڵای فیدراڵی له‌ سه‌ر داوای فیدراڵی ژماره‌ 140 بڕیاریدا به‌ راگرتنی كاركردن به‌ (یاسای ئه‌نجومه‌نی نوێنه‌ران و پێكهاته‌كانی ژماره‌ 13 ساڵی 2018) سه‌ره‌ڕای ئیمزاكردنی له‌ لایه‌ن سه‌رۆك كۆمار و بڵاوكردنه‌وه‌ی له‌ رۆژنامه‌ی وه‌قایع وه‌ك یاسایه‌كی به‌ركار.

به‌پێی مادده‌ی 13 ی ئه‌و یاسایه‌ی كه‌ كارپێكردنی راگیرا، مه‌رجی ته‌مه‌ن و ساڵانی خزمه‌تی لابراوه‌ بۆ خانه‌نشین بوونی ئه‌ندام په‌رله‌مان به‌جۆرێك ئه‌گه‌ر ئه‌ندام په‌رله‌مان ته‌مه‌نیشی نه‌گه‌یشتبێته‌ 50 ساڵان و خزمه‌تی وه‌زیفیشی له‌ 15 ساڵ كه‌متر بوو ئه‌وا هه‌ر رێژه‌یه‌ك له‌ مووچه‌ی خانه‌نشینی ئه‌ندام په‌رله‌مانی وه‌ربگرێت ئه‌ویش به‌ده‌ر له‌ یاسای خانه‌نشینی یه‌كگرتوو ژماره‌ 9 ساڵی 2014 كه‌ مه‌رج و پێوه‌ره‌كانی خانه‌نشین بوونی هاوتا كردوه‌ بۆ پله‌ی باڵا و فه‌رمانبه‌ر و كارمه‌ندی ئاسایی.

دادگای باڵای فیدڕاڵی بڕیاریدا كه‌ كاركردن به‌و یاسایه‌ ڕابگیرێت و بڕیاریدا كه‌له‌ ئێستادا هیچ ئه‌ندام په‌رله‌مانێك مافی وه‌رگرتنی مووچه‌ی خانه‌نشینی نیه‌ تا وه‌ك ھه‌ر فه‌رمانبه‌رێكی ئاسایی ته‌مه‌نی نه‌گاته‌ 50 ساڵ و ساڵانی خزمه‌تیشی له‌ 15 ساڵ كه‌متر نه‌بێت.

پێشتریش دادگای فیدراڵی به‌ بڕیاری ژماره‌ 26 له‌ 24-6-2014 مادده‌ی 37 ی یاسای خانه‌نشینی یه‌كگرتوو ژماره‌ 9 ساڵی 2014 ی ھه‌ڵوه‌شانده‌وه‌ به‌ھۆی ناده‌ستووریی بوونی كه‌ به‌ھه‌مان شێوه‌ مافی خانه‌نشینی دابوو به‌پله‌ تایبه‌ت و پله‌ باڵاكان و ئه‌ندام په‌رله‌مان بێ ره‌چاوی ته‌مه‌ن وساڵانی خزمه‌ت.

PUKmedia به‌ سوپاسه‌وه‌ له‌ فه‌یسبوكی (ئامانج ره‌حیم) وه‌رگیراوه‌