سلێمانی.. نادیه‌ پێشانگای كاری ده‌ستی جانتاو پێڵاو ده‌كاته‌وه‌

.

كچه‌ كوردێكی شاری سلێمانی پێشانگایه‌كی كاری ده‌ستی نه‌خشاندن له‌سه‌ر جانتا و پێڵاوی ژنان ده‌كاته‌وه‌.

نادیه‌ شێخان ساڵی 1981 له‌ شاری كه‌ركوك له‌ دایك بوه‌و له‌ سلێمانی گه‌وره‌ بوه‌و ده‌رچوی كۆلێژی كارگێڕی و ئابوری زانكۆی سلێمانیه‌.

نادیه‌ له‌ دیدارێكدا بۆ PUKmedia ی راگه‌یاند: ماوه‌یه‌كی زۆره‌ حه‌زم به‌ كاری دیزاین و جوانكاری جانتا و پێڵاو بوه‌و سه‌ره‌تا هه‌ر بۆ خۆم كارم كردوه‌ كاتێك جانتایه‌ك یان پێڵاوێكم كڕیوه‌ به‌ساده‌یی به‌كارم نه‌هێناوه‌، ماوه‌ی 4 مانگیشه‌ نزیكه‌ی 50 به‌رهه‌مم ئاماده‌ كردوه‌و ده‌مه‌وێت له‌ پێشه‌نگایه‌كدا به‌ خه‌ڵكی ئاشنا بكه‌م .

وتیشی: سه‌رجه‌م به‌رهه‌مه‌كان بیرۆكه‌ی خۆمه‌ و به‌مێشكی خۆم و له‌گه‌ڵ شێوه‌ی جانتا و پێڵاوه‌كه‌ ده‌یگونجێنم هه‌ربه‌ته‌نهاش كاری له‌سه‌ر ده‌كه‌م.

نادیه‌ ئه‌وه‌ش ده‌خاته‌روو ، كه‌ ده‌ستكه‌وتنی ماركه‌ و برانده‌ جیهانیه‌كان مادده‌یه‌كی زۆری ده‌وێت و هه‌موو كه‌س ناتوانێت بیكڕێت ، منیش به‌هۆی ئه‌وه‌ی حه‌زێكی زۆرم بۆ ئه‌و ماركانه‌ هه‌بوو بڕیارم یاوه‌ خۆم دروستیان بكه‌م.

له‌باره‌ی تێچونی به‌رهه‌مه‌كانیشه‌وه‌ ده‌ڵێت: من ده‌توانم به‌كه‌ل و په‌لی هه‌رزان دیزاین بكه‌م بۆ ئه‌وه‌ی پاره‌ی كه‌می بوێت به‌ڵام ئه‌گه‌ر بمه‌وێت شتێكی جیاواز بێت بێگومان پاره‌ی زیاتری ده‌وێت.

نادیه‌ ئاماده‌یی ئه‌وه‌ش ده‌رده‌بڕێت كه‌ئه‌گه‌ر دوای نمایشكردنی به‌رهه‌مه‌كانی داوای لێبكرێت كار و خواستی له‌سه‌ر بێت به‌رهه‌مه‌كانی ده‌فرۆشێت یان ده‌توانێت بۆ شوێنێكی تایبه‌ت كاربكات به‌مه‌رجێك به‌رهه‌مه‌كان به‌ناوی خۆیه‌وه‌ بڵاو ببنه‌وه‌.

پێشانگای به‌رهه‌مه‌كانی نادیه‌ به‌ ناوی ( نادیه‌ مۆزاك ) له‌ رۆژی پێنج شه‌ممه‌ 2_8_2018 له‌سه‌عات 5ی ئێواره‌ هه‌تا 11 شه‌و له‌ فامیلی مۆڵی سلێمانی ده‌كرێته‌وه‌.

PUKmedia هاژه‌ باست