ژن و به‌شدارییه‌كی یه‌كێتیانه‌ی سیاسه‌ت

.

به‌سروشت ژنان رۆڵێكی كارایان له‌ سیاسه‌ت و بزووتنه‌وه‌ی رزگاریخوازی خه‌ڵكی كوردستاندا هه‌بووه‌، له‌ سه‌رده‌می شۆڕشه‌كانی ساڵانی بیست تا ئه‌گاته‌ شۆڕشی نوێیی گه‌له‌كه‌مان و راپه‌ڕین و سه‌رده‌می حوكمڕانیی له‌ ساڵی 1992ه‌وه‌. له‌گه‌ڵ هه‌موو ئه‌وانه‌شدا هێشتا ژن له‌سه‌ر ئاستی زۆرینه‌ و حزبه‌كان و حكومه‌ت و په‌رله‌مانی كوردستان نه‌یانتوانیوه‌ رۆڵی شایسته‌ی خۆیان وه‌ربگرنه‌وه‌ و ئه‌وه‌ش چه‌ندین هۆكاری خودی و بابه‌تی هه‌یه‌ كه‌ پێویسته‌ له‌سه‌ریان رابووه‌ستین.

له‌و نێوه‌دا ژنانی نێو ریزه‌كانی یه‌كێتیی نیشتیمانیی كوردستان ئازایانه‌تر هاتوونه‌ته‌ كۆڕی خه‌بات و به‌شداریان كردووه‌، له‌سه‌ره‌تای خه‌باتی خانووه‌ قوڕه‌كانه‌وه‌ تا سه‌رده‌می دوای راپه‌ڕین، له‌نێو حزب و رێكخراوه‌كانی، مه‌كته‌ب و ئۆرگانه‌ جۆراوجۆره‌كان ململانێی ئازایانه‌یان كردووه‌ و ئه‌وه‌ش وایكردووه‌ ئازایانه‌تر ده‌نگی حه‌قیان هه‌ڵبڕن و نه‌ترسن له‌ باج و ده‌رئه‌نجامه‌كانی.

ئێستای خه‌باتی یه‌كێتی كه‌ به‌ره‌و ئاسۆیه‌كی گه‌ش ئه‌ڕوات ئاماژه‌كانی زیاتر وا ده‌رئه‌خه‌ن كه‌ ده‌رفه‌تی به‌شداریی زیاتری ژنان له‌ ئۆرگانه‌كانی یه‌كێتی هاتووه‌ته‌ پێش، له‌گه‌ڵ ئه‌وه‌شدا كۆسپ و كه‌له‌به‌ر هه‌ن و پێویسته‌ له‌ڕێگای خه‌باتێكی راست و دروسته‌وه‌ كار بۆ نه‌هێشتنی بكرێت.

وه‌ستانی ژنان بۆ ئه‌وه‌ی مافه‌كانیان پێ بدرێته‌وه‌ كارێكی ته‌ندروست نییه‌، به‌ڵكو پێویسته‌ ژنان له‌ خۆیانه‌وه‌ ده‌ستپێبكه‌ن، خودی خۆیان ئالزادبكه‌ن و دواتریش له‌ڕێگای كاری پێكه‌وه‌یی و خۆسازدانه‌وه‌ بۆ قۆناغی وه‌رگرتنه‌وه‌ی زیاتری مافه‌كان بێنه‌ پێشه‌وه‌ و هاوشانی پیاوه‌ ئازادیخوازه‌كان چی ده‌توانن بیكه‌ن و به‌شێوه‌یه‌كی قۆناغ به‌ندی یه‌كسانیی نێوان ژن و پیاو بچه‌سپێنن.

ژنانی یه‌كێتی له‌پشت و له‌نێو خه‌باتی ژنانه‌یاندا روئیای سه‌رۆك مام جه‌لال بۆ ئازادی ژن و كۆتاییهێنان به‌ چه‌وساندنه‌وه‌ هه‌یه‌، ئه‌و رێباز و بیركردنه‌وه‌ كه‌ خۆی له‌نێو فه‌لسه‌فه‌ی جه‌لالیزمدا ده‌بینێته‌وه‌ بۆ ژنانی یه‌كێتی هیوابه‌خشه‌ و ده‌توانرێت سوودی زۆری لێ ببینرێت.

ئێستا كه‌ قۆناغی كاری مه‌ده‌نی و په‌رله‌مانییه‌ ژنان له‌هه‌ركات زیاتر پێویستیان به‌چڕتركردنه‌وه‌ی خه‌باتی خۆیان هه‌یه‌، ئازایانه‌ و ئازادانه‌، خۆسازدانی پێكه‌وه‌یی به‌رنامه‌دار تا ئه‌گاته‌ ئه‌وه‌ی ئیراده‌یه‌كی ژنان وه‌به‌ربهێنرێت كه‌ بیركردنه‌وه‌ی پیاوانه‌ ناچار به‌وه‌ بكات به‌یه‌كسانیی له‌گه‌ڵ ژن رازی بێت و به‌و شێوه‌یه‌ش ژنانی یه‌كێتی ده‌بنه‌وه‌ سه‌رمه‌شقی قۆناغێكی دیكه‌ی خه‌بات كه‌ له‌سه‌ده‌ی بیست و یه‌كدا دره‌وشاوه‌تر ده‌بێت.

تانیا كفری
PUKmedia