دوو ساڵ دوای كوده‌تا سه‌رنه‌كه‌وتووه‌كه‌ی توركیا

.

ئه‌مڕۆ 15ی ته‌مووز دوو ساڵ به‌سه‌ر كوده‌تا سه‌رنه‌كه‌وتووه‌كه‌ی سوپای توركیا له‌وڵاته‌ تێده‌په‌ڕێت، كوده‌تایه‌ك كه‌ 250 كوژراو و 2375 برینداری لێكه‌وته‌وه‌ و به‌ هه‌زاران كه‌سیش ده‌ستگیر و زیاتر له‌ 100 هه‌زار كه‌سیش له‌سه‌ر كاره‌كانیان دوورخرانه‌وه‌.

دوو ساڵ له‌مه‌وبه‌ر ژماره‌یه‌ك له‌ جه‌نه‌ڕاڵ و ئه‌فسر پله‌باڵاكانی توركیا به‌مه‌به‌ستی لابردنی حكومه‌تی ئاكپارتی ده‌ستیان دایه‌ كوده‌تایه‌ك كه‌ سه‌ركه‌وتوو نه‌بوو و ئه‌نجامده‌رانی كوده‌تاكه‌ زۆربه‌یان ده‌ستگیر كران و ژماره‌یه‌كیش په‌نایان بۆ یۆنان و ئه‌ڵمانیا و چه‌ند وڵاتێكی ئه‌وروپی برد.

ئه‌ردۆگان كوده‌تا سه‌رنه‌كه‌وتووه‌كه‌ی توركیای به‌ نێعمه‌تێكی خوایی له‌قه‌ڵه‌مدا و وتی ئه‌مه‌ له‌ دایكبوونێكی تره‌.

له‌دوای كوده‌تاكه‌ تا ئێستا حاڵه‌تی نائاسایی له‌و وڵاته‌دا ڕاگه‌یه‌ندراوه‌ و كه‌شوهه‌وایه‌كی پۆلیسی باڵی به‌سه‌ر ئه‌و وڵاته‌دا كێشاوه‌.

له‌ ساڵی 2016 وه‌ تا ئێستا زیاتر له‌ 107 هه‌زار كه‌س له‌ توركیا له‌سه‌ر پۆسته‌كانیان دوورخراونه‌ته‌وه‌ و زیاتر له‌ 50 هه‌زار كه‌سیش له‌ گرتووخانه‌كانی ئه‌و وڵاته‌ چاوه‌ڕوانی ڕۆژی دادگایی كردنیان ده‌كه‌ن.

به‌پێی زانیارییه‌كان 25% له‌ دادوه‌ره‌كان له‌ ده‌زگای دادوه‌ری دوورخراونه‌ته‌وه‌ به‌ تۆمه‌تی ئه‌وه‌ی كه‌ ده‌ستیان له‌ كوده‌تاكه‌ هه‌بووه‌ و هاوكاتیش سۆزیان بۆ بزوتنه‌وه‌ی خزمه‌ت به‌ سه‌رۆكایه‌تی فه‌تحوڵا گوله‌ن هه‌بووه‌.

5000 هه‌زار مامۆستای زانكۆ و 33هه‌زار مامۆستا ناوه‌ندی و دواناوه‌ندی له‌سه‌ر كار ده‌ركراون.

دادگای توركیا 280 ئه‌فسه‌ری پله‌به‌رزی توركیای له‌ دوای كوده‌تاكه‌ ده‌ستگیر كرد كه‌ 104 كه‌سیان به‌تاوانی به‌شداریكردن له‌ كوده‌تا و هه‌وڵدان بۆ كوشتنی سه‌رۆك كۆمار به‌ زیندانی هه‌تاهه‌تایی سزا دراون.

 به‌پێی زانیارییه‌كان 150 ڕۆژنامه‌نووس و میدیاكار له‌ئێستادا له‌ گرتووخانه‌كانی توركیا به‌ند كراون.

ئه‌مه‌ له‌كاتێكدایه‌ كه‌ له‌ دوای كوده‌تا سه‌رنه‌كه‌وتووه‌كه‌ له‌ توركیا ده‌ستووری ئه‌و وڵاته‌ هه‌مواركرایه‌وه‌ و سیستمی په‌رله‌مان بۆ سیستمی سه‌رۆكایه‌تی گۆڕدرا و پۆستی سه‌رۆك وه‌زیران نه‌ما و هه‌موو ده‌سه‌ڵاته‌كان له‌لای سه‌رۆك كۆمار گلدراوه‌ته‌وه‌ و بارودۆخی ئابووری توركیا له‌و په‌ری خراپی دایه‌ و لیره‌ی توركی گه‌یشتووه‌ به‌ نزمترین ئاستی خۆی.

PUKmedia و/ باشیلا جه‌عفه‌ر
سه‌رچاوه‌/ ئاژانسه‌كان