سه‌رۆك كۆمار 60ـه‌مین ساڵيادی كۆماری عیراق و 14ی ته‌ممووز به‌رز راده‌گرێت

.

د.فوئاد مه‌عسوم سه‌رۆك كۆماری عیراق یادی شه‌سته‌مین ساڵڕۆژی دامه‌زراندنی كۆماری عیراق و یادی شۆڕشی چوارده‌ی ته‌ممووزی نیشتمانی ساڵی 1958ی به‌رز نرخاند.

سه‌رۆك كۆمار ستایشی پره‌نسیبه‌كانی سه‌ربه‌خۆیی نیشتمانی و عه‌داله‌تی كۆمه‌ڵایه‌تی و پێودانگه‌كانی پێكه‌وه‌ ژیان و یه‌كڕیزی نیشتمانی كرد كه‌ شۆڕشه‌كه‌ دایڕشتبوو داوای ده‌كرد به‌ شانازی و پێزانینه‌وه‌ رۆڵی رابه‌ری كۆچكردووی شۆڕشه‌كه‌ زه‌عیم عه‌بدولكه‌ریم قاسمی به‌بیر هێناوه‌ته‌وه‌.

سه‌رۆك كۆمار له‌ راگه‌یه‌نراوێكی رۆژنامه‌وانیدا گرنگی ئه‌و پره‌نسیبانه‌ی دووپاتكردوه‌ته‌وه‌ كه‌ شۆڕشه‌كه‌ خستبویه‌ڕوو بۆ دامه‌زراندنی په‌یوه‌ندی دیپلۆماتی و ئابوری له‌گه‌ڵ هه‌موو ده‌وڵه‌تانی جیهاندا له‌سه‌ر بناغه‌ی یه‌كسانی و به‌رژه‌وه‌ندی دوولایه‌نه‌و ره‌تكردنه‌وه‌ی سیاسه‌تی وابه‌سته‌بوون كه‌ سه‌ره‌نجام له‌ پابه‌ندبوونی عیراق به‌ سیاسه‌تی بێلایه‌نی و پاشه‌كشێی له‌ په‌یمانی به‌غداو په‌ره‌پێدانی سه‌ربه‌خۆیی ئابوری و دارایی ده‌ركردنی قانونی ژماره‌ 80 به‌رجه‌سته‌ بوو كه‌ مافه‌كانی عیراقی گه‌ڕانده‌وه‌ بۆ سوود وه‌رگرتن له‌ داهاته‌كانی نه‌وت.

هاوكات ئاماژه‌یكردووه‌ بۆ چه‌سپاندنی قانوونی چاككردنی كشتوكاڵ و به‌ڕه‌سمی ناسینی مافه‌ نه‌ته‌وه‌ییه‌كانی گه‌لی كورد به‌وه‌ی عیراقییه‌كان هه‌موویان له‌ وڵاتدا شه‌ریك و یه‌كسانن له‌ ماف و ئازادییه‌كاندا بێ جیاوازی. روونیشیكردوه‌ته‌وه‌ كه‌ هه‌ر ئه‌و شۆڕشه‌ قانونی باری كه‌سێتی ده‌ركردو چه‌ندین ده‌ستكه‌وتی نیشتمانی تریشی ده‌سته‌به‌ر كرد.

PUKmedia تایبه‌ت