یه‌كێتی: له‌ رێژه‌ی ده‌نگه‌كانی خۆمان دڵنیاین

.

وته‌بێژی ده‌زگای هه‌ڵبژاردنی یه‌كێتی رایده‌گه‌یه‌نێت: وه‌ك شاره‌كانی كه‌ركوك و سلێمانی له‌ هه‌ولێریش له‌ ده‌نگه‌كانی خۆمان دڵنیاین.

د. بڕیار ره‌شید وته‌بێژی ده‌زگای هه‌ڵبژاردنی یه‌كێتیی نیشتمانیی كوردستان ئه‌مڕۆ 11-7-2018، به‌ PUKmedia ی راگه‌یاند: ئه‌مڕۆ پرۆسه‌ی هه‌ژماركردنه‌وه‌ی ده‌ستی ده‌نگه‌كان له‌ شاری هه‌ولێر ده‌ستپێده‌كات و وه‌ك یه‌كێتیی نیشتمانیی كوردستان وه‌ك چۆن له‌ رابردودا ئه‌وه‌مان دووپاتكردوه‌ته‌وه‌ كه‌ له‌گه‌ڵ یاساو بڕیاره‌كانی كۆمسیۆنی باڵای سه‌ربه‌خۆی هه‌ڵبژاردنه‌كانین و دڵنیاشین له‌ ده‌نگه‌كانی خۆمان له‌ هه‌موو شاره‌كانی كوردستان و نه‌ك به‌ته‌نها له‌ كه‌ركوك و سلێمانی، به‌ڵكو له‌ شاری هه‌ولێریش.

 وتیشی: گومان و سكاڵایه‌كی زۆر كرابووه‌ سه‌ر یه‌كێتی له‌ شاره‌كانی كه‌ركوك و سلێمانی و هه‌مان كات تۆمه‌تێكی ناڕه‌وای زۆریش كرابووه‌ سه‌رمان له‌و دووشاره‌، به‌ڵام ئه‌نجامی هه‌ژماردنه‌وه‌ی ده‌ستی ده‌نگه‌كان له‌و دوو شاره‌ ئه‌وه‌ی سه‌لماند كه‌ تۆمه‌ته‌كانی كه‌ ده‌خرانه‌ پاڵمان هه‌موویان ناڕه‌واو درۆبوون و راستییه‌كان بۆ هه‌موو خه‌ڵكی كوردستان ئاشكرابوو.

د. بڕیار راشیگه‌یاند: ئێمه‌ له‌ پرۆسه‌ی هه‌ڵبژاردن له‌ پارێزگای هه‌ولێر تێبینی و سكاڵای زۆرمان تۆماركردوه‌و به‌شێوه‌یه‌كی یاسایی سكاڵاو تێبینییه‌كانمان راده‌ستی كۆمسیۆن كردوه‌و چاوه‌ڕی ئه‌وه‌ ده‌كه‌ین وه‌ڵامه‌كان وه‌ربگرینه‌وه‌، هه‌روه‌ها وتی: چۆن له‌ ده‌نگه‌كانمان دڵنیابوون له‌ كه‌ركوك و سلێمانی له‌ هه‌ولێریش هه‌روا دڵنیاین و چاوه‌ڕێی ئه‌نجامی پرۆسه‌ی هه‌ژماركردنه‌وه‌ی ده‌ستی ده‌نگه‌كان ده‌كه‌ین له‌ شاری هه‌ولێریش.

PUKmedia زانیار مه‌جید