ژماردنه‌وه‌ی ده‌نگه‌كان له‌ سلێمانی كۆتایی دێت

.

ژماردنه‌وه‌ی ده‌نگه‌كان له‌ سلێمانی كۆتایی دێت و رێژه‌ی ده‌نگی یه‌كێتیش له‌و پارێزگایه‌ وه‌ك خۆی ده‌مێنێته‌وه‌.

وته‌بێژی ده‌زگای هه‌ڵبژاردنی یه‌كێتی رایده‌گه‌یه‌نێت، نزیكه‌ی 150 سندوقی ده‌نگدان ژماردنه‌وه‌یان بۆ كراوه‌و ده‌نگه‌كانی یه‌كێتی-ش وه‌ك خۆیه‌تی و ئه‌نجامی ژماردنه‌وه‌ی ده‌نگه‌كان به‌ ئه‌لكترۆنی و ده‌ستی وه‌ك یه‌كن.

د.بڕیار ره‌شید وته‌بێژی ده‌زگای هه‌ڵبژاردنی یه‌كێتیی نیشتمانیی كوردستان به‌ PUKmedia ی راگه‌یاند: بڕیاره‌ ئه‌مڕۆ 10-7-2018 كۆتایی به‌ پرۆسه‌ی هه‌ژماركردنه‌وه‌ی ده‌نگه‌كان له‌ سلێمانی بهێنرێت و رێژه‌ی ده‌نگی یه‌كێتیش وه‌ك خۆی ماوه‌ته‌وه‌.

وتیشی: پرۆسه‌كه‌ زۆر به‌ شه‌فافانه‌و به‌ ئارامی به‌ڕێوه‌ده‌چێت و له‌ دوێنێوه‌ كه‌ ده‌ستكراوه‌ به‌ ژماردنه‌وه‌ی ده‌نگه‌كانی پارێزگای سلێمانی و نزیكه‌ی 150 سندوق به‌ ده‌ست هه‌ژماركراونه‌ته‌وه‌و ته‌نها 38 سندوق ماون.

د.بڕیار ره‌شید راشیگه‌یاند: پرۆسه‌ی ژماردنه‌وه‌ی سندوقه‌كانی ده‌نگدان كه‌ سكاڵایان له‌سه‌ربووه‌ ژماره‌یان 188 سندوق بووه‌و له‌ئێستادا ته‌نها 38 سندوق ماون و چاوه‌ڕوان ده‌كرێت تا ئێواره‌ی ئه‌مڕۆ ئه‌و سندوقانه‌ش به‌ ده‌ست هه‌ژماربكرێنه‌وه‌.

ماوه‌ی دوو رۆژه‌ ژماردنه‌وه‌ی ده‌نگه‌كان له‌ لایه‌ن كۆمسیۆنی باڵای هه‌ڵبژاردنه‌كانی عیراقه‌وه‌ له‌ سلێمانی ده‌ستیپێكردوه‌و بڕیارشه‌ ئێواره‌ی ئه‌مڕۆ كۆتایی به‌پرۆسه‌ بێت و وته‌بێژی ده‌زگای هه‌ڵبژاردنی یه‌كێتی-ش ئاماژه‌ بۆ ئه‌وه‌ده‌كات، ده‌نگه‌كانی یه‌كێتی له‌ سلێمانی هاوشێوه‌ی كه‌ركوك كه‌مناكات و وه‌ك خۆی ده‌مێنێته‌وه‌، ئه‌مه‌ جگه‌ له‌ئه‌وه‌ی كه‌ سكاڵامان له‌سه‌ر چه‌ند سندوقێك هه‌بووه‌و كۆمسیۆنمان لێ ئاگاداركردوه‌ته‌وه‌.

PUKmedia دیار ستار