ئه‌نجومه‌نی ناوه‌ندی پێشوازی له‌ مامۆستا سه‌یفه‌دین ده‌كات

.

ئه‌مڕۆ 2-7-2018 هه‌ڤاڵانی سكرتاریه‌ت و ژماره‌یه‌ك له‌ ئه‌ندامانی ئه‌نجومه‌نی ناوه‌ندی پێشوازیان له‌ تێكۆشه‌رو پێشمه‌رگه‌ی دێرین مامۆستا سه‌یفه‌دین كردو بارودۆخی ناوخۆی یه‌كێتی و دوایین گۆڕانكاری و پێشهاته‌ سیاسییه‌كانی كوردستانیان تاووتوێكرد.

سه‌ره‌تا زوبێر عوسمان جێگری سكرتێری ئه‌نجومه‌نی ناوه‌ندی به‌خێرهاتنی مامۆستا سه‌یفه‌دین تێكۆشه‌ری دێرینی كردو رۆڵی له‌ رۆژانی سه‌ختی خه‌بات و تێكۆشان و شانه‌ نهێنی و رێكخستنه‌كان و چالاكییه‌كانی ناو شارو سه‌رده‌می پێشمه‌رگایه‌تی و هه‌موو قۆناغه‌كانی ژیانی به‌گرنگ وه‌سفكردو رایگه‌یاند: تێكۆشه‌رانی یه‌كێتی هه‌موو ته‌مه‌نی خۆیان بۆ به‌ده‌ستنهێنانی مافه‌ ره‌واكانی گه‌له‌كه‌مان ته‌رخانكردو سڵیان له‌هیچ زه‌برو زه‌نگێكی رژێمی به‌عسی له‌ناوچوو و دوژمنانی گه‌له‌كه‌مان نه‌كرد، مامۆستا سه‌یفه‌دینیش یه‌كێكه‌ له‌ تێكۆشه‌رو پێشمه‌رگه‌ دانه‌بڕاوه‌كان كه‌ له‌ هه‌موو قۆناغه‌ گرنگ و هه‌ستیاره‌كاندا هه‌ر ئه‌ركێكی پێسپێردرابێت زۆر دڵسۆزانه‌و لێبڕاوانه‌ جێبه‌جێی كردووه‌.

هه‌روه‌ها كارو چالاكییه‌كانی ئه‌نجومه‌نی ناوه‌ندی و و رۆڵ و هه‌ڵوێسته‌كانی له‌سه‌ر پرسه‌ گرنگ و چاره‌نووسسازه‌كان بۆ ناوخۆی یه‌كێتی و كوردستان و ناوچه‌كه‌ خسته‌ڕوو.

له‌ به‌رامبه‌ریشدا مامۆستا سه‌یفه‌دین سوپاسی ئه‌و پێشوازییه‌ گه‌رمه‌ی ئه‌نجومه‌نی ناوه‌ندی كردو رایگه‌یاند: ئه‌نجومه‌نی ناوه‌ندی په‌رله‌مانی حزبه‌كه‌مانه‌و ئۆرگانێكی گرنگه‌و كارو چالاكییه‌كانی له‌ ماوه‌ی رابردووداو ئه‌رك و هه‌ڵوێسته‌كانی جێی شانازی هه‌موو یه‌كێتییه‌كانه‌.

وتیشی: به‌هه‌وڵی هه‌موو لایه‌كمان یه‌كێتی ناو یه‌كێتی ده‌پارێزین و سه‌ركه‌وتنی زیاتر بۆ یه‌كێتیه‌كه‌مان تۆمارده‌كه‌ین و پێگه‌و پایه‌ی ئه‌م حزبه‌ خاوه‌ن رووباره‌ شه‌هیده‌ له‌ كوردستان و ناوچه‌كه‌ ده‌پارێزین.

له‌ دیداره‌كه‌دا هه‌ڤاڵانی ئه‌نجومه‌نی ناوه‌ندی و مامۆستا سه‌یفه‌دین ره‌وشی ئێستای هه‌رێم و ناوخۆی یه‌كێتییان تاووتوێ كردو ئاماده‌كارییه‌كان بۆ هه‌ڵبژاردنه‌كانی هه‌رێم و چڕكردنه‌وه‌ی هه‌وڵه‌كان به‌ ئاڕاسته‌ی پله‌ی یه‌كه‌مبوونی یه‌كێتی له‌ هه‌ڵبژاردنه‌كاندا دووپاتكرایه‌وه‌.

PUKmedia تایبه‌ت