دیندار زێباری:لە كۆی ٣٥٤٨ ژن ١٤٦٥ ژنی ژێر دەستی داعش رزگار كراون

.

لە دوای داگیركردنی شەنگال لەلایەن داعشەوە زیاتر لە ھەموو چین و توێژەكان ژنان بوونە قوربانی و زەرەرمەندی سەرەكی بوون لەم نێوەندەدا،ھەر بۆیە حكومەتی ھەرێم ھەنگاوی جددی ھەڵھێناوە بۆ  چارەسەركردن و قەرەبوو كردنەوەی ئەو كەسانەی لەم ھێرشانەی داعشدا زیانیان بەركەوتووە.

 دیندار زێباری، رێكخەری راسپاردە نێودەوڵەتییەكان لە ھەرێمی كوردستان رایگەیاند: پاش ئەوەی تیرۆریستانی داعش لە 3-8-2014 ھێرشیان كردە سەردەڤەری شنگال و ژمارەیەكی زۆری ژن بوونە قوربانی و توشی چەندین زەرەر و زیان بوونەتەوە، لە ناویاندارفاندنی ٣٥٤٨ ژن و دەستدرێژی كردنە سەریان.

زێباری راشیگەیاند:بۆ كۆكردنەوەی زانیاری و بەدواداچوون لە كەیسی رفێندراوەكان نووسینگەی تایبەتی جەنابی سەرۆكی حكومەتی هەرێمی كوردستان لە رۆژی 25-11-2014 لیژنەیەكی تایبەتی دامەزراند وبودجەیەكی تایبەتی تەرخان كردووە بۆرزگاركردنیان، دوای گەڕانەوەشیان حكومەت هەموو ئامادەكارییەك دەكات بۆ حەواندنەوەیان و دووبارەگەڕاندنەوەیان بۆ نێو كۆمەڵگا.

لە درێژەی قسەكانیدا رێكخەری راسپاردە نێودەوڵەتییەكان وتی: حكومەت لەرووی ماددی و مەعنەویەوە ئەركی رزگاكردنی ژنە ئێزیدییە رفێندراوەكانی گرتووەتە ئەستۆ و بەهەوڵە بەردەوامەكانی تا ڕۆژی23-5-2018 توانیان (3275) كەس رزگار بكەن لەوانە(1148) ژن و (336) پیاو و (935) كچ و (956) كوڕ ڕزگار كراون، ئەوانەی تائێستا ڕزگار نەكراون ژمارەیان (3146) كەسە لەوانە (1465) ژن و (1685) پیاو كە لە دەست داعش ماون.

زێباری وتیشی: ئەو ژنە كە رزگار دەكرێن تووشی جۆرەھا رەفتاری دڕندانە و دوور لەهەموو عورف و دابونەریتێكی مرۆڤانە،لە فرۆشتن و كڕین و ئەشكەنجەدانی جەستەیی و دەروونی و گۆڕینی ئایینەوە بگرە تا دەگاتە تاوانی دەستدرێژی سێكسی بوونەتەوە.زۆربەی ھەرەزۆری ئەو ژنانەی كە رزگاردەبن، باری دەروونی و تەندروستی جەستەییان زۆر خراپە و پێویستیان بەچارەسەری ھەیە، ھەر بۆیە تا ئێستانزیكەی (100) ژن لەو ئافرەتانەی رزگاركراون، رەوانەی وڵاتی ئەڵمانیا كراون بۆ چارەسەركردن بەتایبەتی لەرووی دەروونییەوە .

دیندار زێباری لە كۆتایی لێدوانەكەیدا داوای لە كۆمەڵگای نێودەوڵەتی، رێكخراوە نێودەوڵەتییەكان و  ئاژانسەكانی یوئێن كرد كە ھاوكاری حكومەتی ھەرێم بكەن لە رزگاركردنی ئەو ئێزیدیانەی لەدەست داعش ماون وچارەسەر كردنی ئەوانەی لەلایەن حكومەتی ھەرێمەوە رزگار كراون.

PUKmedia   تایبەت