پێشانگایه‌ك تایبه‌ت به‌ پیرشالیار ده‌كرێته‌وه‌

.

پێشنیوه‌ڕۆی ئه‌مرۆ 27-6-2018 له‌ ساڵۆنی كوردستانی نوێ پێشانگایه‌كی وێنه‌یی بۆ تابلۆكانی حه‌مه‌عومه‌ر كرایه‌وه‌ كه‌ تایبه‌ته‌ به‌ نیشاندانی مه‌راسیمێكی كۆنی كورده‌واری.

 سه‌باره‌ت به‌ كردنه‌وه‌ی پێشانگاكه‌ حه‌مه‌ عومه‌ری فۆتۆگرافه‌ر له‌ لێدوانێكیدا بۆ  PUKmedia  ی وتی: ئه‌مه‌ چواره‌مین پێشانگای تایبه‌تی منه‌ و له‌ 20 تابلۆ پێكدێت، ئه‌م تابلۆیانه‌ گوزارشت له‌ مه‌راسیمی پیرشالیار ده‌كات كه‌ له‌ هه‌ورامانی ته‌ختی رۆژهه‌ڵاتی كوردستان ساڵانه‌ به‌ڕێوه‌ ده‌چێت.

وتیشی: مه‌به‌ست له‌م پێشانگایه‌ ناساندنی ئه‌و مه‌راسیمه‌یه‌ كه‌ یه‌كێكه‌ له‌ كۆنترین مه‌راسیمه‌كانی نه‌ته‌وه‌ی كورد و هه‌زاره‌ها ساڵه‌ به‌ڕێوه‌ ده‌چێت و منیش هه‌وڵمداوه‌ له‌ رێگه‌ی تابلۆكانمه‌وه‌ به‌ خه‌ڵكی بناسێنم.

 وتیشی: كاری هه‌موو وێنه‌گرێك كه‌ له‌ بواری رۆژنامه‌نوسی و دۆكۆمێنتاریدا كار ده‌كات بێگومان میژوو نووسینه‌وه‌یه‌، گه‌لی كورد له‌ ڕووی مێژوویه‌وه‌ خۆی مێژووی خۆی نه‌نووسیوه‌ته‌وه‌، به‌ڵكوو بێگانه‌ و خه‌ڵكی تر تۆماری كردووه‌، هیوادارم بتوانین به‌ هه‌موو فۆتۆگرافه‌ره‌كانی تر مێژووی خۆمان بنووسینه‌وه‌.

PUKmedia گۆران قادر