كۆسرەت رەسول عەلی پێشوازی لە خانەوادەی رائید مەهدی دەكات

.

ئێوارەی ئەمڕۆ 23-6-2018 لە شاری هەولێر كۆسرەت رەسول عەلی جێگری سكرتێری گشتی یەكێتی نیشتمانی كوردستان پێشوازی كرد لە خانەوادەو كەسوكاری رائیدی كۆچكردوو مەهدی مەحمود حەمەد.

لەمیانی پێشوازیكردنەكەیدا، جێگری سكرتێری گشتی پرسەو سەرەخۆشی و هاوخەمی خۆی گەیاندە خانەوادەو كەسوكاری خوالێخۆشبوو و هیوای خواست كە ئەمە دوا كۆست و ناخۆشی هەموو لایەك بێت و كۆچكردووش جێگای بەهەشت بێ و خوای گەورە شیفای خێراو بەپەلە بۆ كوڕەكەی بنێرێ، كە ئێستا لەنەخۆشخانە لەژێر چاودێری وردی پزیشكیدایە.

لە درێژەی قسەكانیدا كۆسرەت رەسول عەلی گوتی"رائید مەهدی پێشمەرگەیەكی ئازاو قارەمان و گیان لەسەر دەست بوو، لە ماوەی 20 ساڵ تەمەنی پێشمەرگایەتیدا قارەمانانە خزمەتی كردووەو لە دەیان داستان و نەبەردیدا بەشداری كردووە".

جێگری سكرتێری گشتی ئاماژەی بۆ ئەوەش كرد كە لەدەستدان و كۆچكردنی رائید مەهدی خەسارەتێكی گەورە بوو لە ریزەكانی هێزی پێشمەرگەی كوردستان كەوت و كەلێنێكە بە ئاسانی پڕ نابێتەوە.

لای خۆیانەوە خانەوادەی رائید مەهدی سوپاسی كۆسرەت رەسول عەلی-یان كردو رایانگەیاند كە هەمیشە بەڕێزیان چەترێك بووە بۆ هەمووان و دووپاتیشیان كردەوە كە لەسەر رێگای كۆچكردوو بەردەوام دەبن لە خەبات كردن.

PUKmedia  نوسینگەی رۆژنامەوانی كۆسرەت رەسوڵ