ئامارێكی ترسناك له‌باره‌ی په‌نابه‌ران ئاشكرا ده‌كرێت

.

به‌پێی ڕاپۆرتێكی نه‌ته‌وه‌ یه‌كگرتووه‌كان زیاتر له‌ 52% له‌ ئاواره‌ و په‌نابه‌ره‌كانی جیهان له‌ منداڵانی ژێر 18 ساڵ پێكدێت و ڕۆژانه‌ 44 هه‌زار و 400 كه‌س له‌ماڵ و حاڵی خۆیان ئاواره‌ ده‌بن.

به‌پێی نوێترین ئاماری نه‌ته‌وه‌ یه‌كگرتووه‌كان، ڕێژه‌ی په‌نابه‌رانی جیهان ڕووی له‌ به‌رزبوونه‌وه‌یه‌كی بێوێنه‌یه‌ و مه‌ترسییه‌كان بۆ سه‌ر په‌نابه‌ران ڕوو له‌ زیاد بوونه‌.
له‌ ڕاپۆرتێكی نوێی كۆمیسیاری باڵای سه‌ربه‌نه‌ته‌وه‌ یه‌كگرتووكان له‌ ئێستادا رێژه‌ی په‌نابه‌رانی جیهان گه‌یشتووه‌ به‌ 68 ملیۆن و پێنسه‌د هه‌زار كه‌س.

له‌ڕاپۆرته‌كه‌دا هاتووه‌ كه‌ له‌ یه‌ك ساڵی ڕابردوودا ڕۆژانه‌ 44 هه‌زار و 400 كه‌س به‌هۆی شه‌ڕ و توندوتیژی و ناله‌باربوونی دۆخی ژیان له‌ماڵ و حاڵی خۆیان ئاواره‌ بوون و په‌نایان بۆ شوێنی تر بردووه‌.

زۆرترین په‌نابه‌ر هی وڵاتی سوریایه‌ 6 ملیۆن و 300 هه‌زار كه‌س، ئه‌فغانستان 2ملیۆن 600 هه‌زار كه‌س، سودانی باشوور یه‌ك ملیۆن و 200 هه‌زار كه‌س و میانمار یه‌ك ملیۆن و بیست هه‌زار كه‌س و سۆماڵ نزیكه‌ی 990 هه‌زار كه‌س په‌نابه‌ر.

ئه‌و وڵاتانه‌ی كه‌ زۆرترین په‌نابه‌ریان وه‌رگرتووه‌ توركیا سێ ملیۆن و پێنسه‌د هه‌زار په‌نابه‌ر، پاكستان یه‌ك ملیۆن و چوارسه‌د هه‌زار په‌نابه‌ر، ئۆگاندا یه‌ك ملیۆن و چوارسه‌د هه‌زار په‌نابه‌ر، ئێران نزیكه‌ی 980 هه‌زار كه‌س و ئه‌ڵمانیا 970 هه‌زار په‌نابه‌ریان وه‌رگرتووه‌.

PUKmedia و/ باشیلا جه‌عفه‌ر
سه‌رچاوه‌/ بی بی سی