عەدنان موفتی: عەبدولڕەزاق فەیلی هەرگیز داوای پلەو پۆستی نەكردوە

.

لەسلێمانی پرسەی عەبدولڕەزاق فەیلی ئەندامی دەستەی دامەرزێنەری یەكێتی كۆتاییهات و لەبارەگای مەكتەبی سیاسیش مەراسیمێكی بۆ رێكخرا.

ئەمڕۆ 14ی حوزەیرانی 2018، پرسەی ماتەمینی عەبدولڕەزاق فەیلی ئەندامی دەستەی دامەزرێنەری یەكێتیی نیشتمانیی كوردستان لەمزگەوتی ئەحمەدی حاجی عەلی لەسلێمانی بەئامادەبوونی سەرۆك كۆماری عیراق و ئەندامانی مەكتەبی سیاسی و سەركردایەتی یەكێتی و لێپرسراوانی لایەنەكانی دیكەو بەرپرسانی حكومەتی بەڕێوەچوو.

دوای كۆتاییهاتنی مەراسی پرسەكەشی، لەبارەگای مەكتەبی سیاسی یەكێتییی نیشتمانیی كوردستان لەسلێمانی مەراسیمێكی ماڵئاوایی بۆ رێكخرا.

لەمەراسیمەكەدا، عەدنان موفتی ئەندامی مەكتەبی سیاسی یەكێتی و  هاوڕێی رۆژانی درێژی خەباتی عەبدولڕەزاق فەیلی، لەبارەی كۆچكردوەتەوە باسی لەوەكرد كە عەبدولڕەزاق فەیلی هەر لەتەمەنی لاوێتییەوە بۆتە سكرتێری لاوانی كوردستان و دوای هەرەسی شۆڕش لەساڵی 1975 و هەڵگیرسانەوەی شۆڕشی نوێ لەگەڵ كۆچكردو عادل موراد چونەتە سوریاو لەوێ لەگەڵ سەرۆك مام جەلال و هاوڕێیانیان مژدەی دەستپێكردنەوەی شۆڕشیان راگەیاند.

وتیشی: عەبدولڕەزاق فەیلی سونبوڵێك بوو لەدڵسۆزی و بەوەفابووە، بەدرێژایی تەمەنی خۆی داوای پۆست و پلەی حزبی و حكومی نەكردوە، بەڵكو لەهەر شوێنێكدا ئەركێكی پێبسپێردرایە بەدڵسۆزی جێبەجێی دەكرد.

عەدنان موفتی باسی لەوەشكرد كە تێكۆشەرو حزبەكانی هەر چوار پارچەی كوردستان  عەبدولڕەزاق فەیلی دەناسن.

 PUKmedia تایبەت