كەشوهەوای رۆژانی جەژنی راگەیەنرا

.

كەشناسی هەرێم رایگەیاند لەرۆژانی جەژنی رەمەزاندا ئاسمان ساماڵ دەبێت و پلەكانی گەرماش دابەزین بەخۆیەوە دەبینێت و  بۆ ماوەیەك بەجێگری دەمێنێتەوە.

بەڕێوەبەرایەتی گشتی كەشناسی و بومەلەرزەزانی هەرێمی كوردستان لەبارەی كەشوهەوای رۆژانی جەژن لە راگەیەنراوێكیدا كە وێنەیەكی دەست PUKmedia كەوتووە، رایگەیاند: هەرێمی كوردستان هەر لەژێر كاریگەری نزمە پاڵەپەستۆی نیمچە دوورگەی عەرەبی دەمێنێتەوەو ئاسمانی هەرێم لەرۆژانی جەژن بەگشتی ساماڵ دەبێت.

ئەوەشی رونكردۆتەوە: یەكەم رۆژی جەژن پلەكانی گەرما بەچەند پلەیەك روو لەبەرزبوونەوە دەكات و پلەی گەرمای شارەكانی هەرێمی لەنێوان 37 بۆ 40 پلە دەبێت، بەمشێوەیە، (سلێمانی 37، هەولێر 40، هەڵەبجە 39، دهۆك 37، كەركوك 42) پلەی سیلیزی دەبێت.

كەشناسی هەرێم دەشڵێت: دووەم رۆژی جەژن پلەكانی گەرما كەمێك نزمدەبێتەوەو سێیەم رۆژیش نزمتر دەبێتەوە، پاشان بۆ ماوەیەك پلەكانی گەرما بەجێگیری دەمێنێتەوە.

PUKmedia تایبەت