ئه‌و شاورمانه‌ی له‌ هه‌ولێره‌وه‌ هاورده‌ی سلێمانی كراون له‌ناوده‌برێن

.

له‌لایه‌ن لیژنه‌ هاوبه‌شه‌كانی قائیمقامیه‌تی سلێمانیه‌وه‌ بڕێكی زۆر شاورمه‌ له‌ناوده‌برێت و خاوه‌نه‌كه‌شی رێكاری پێویستی به‌رامبه‌ر ده‌گیرێته‌به‌ر.

ده‌روێش فه‌ره‌ج نوێنه‌ری به‌ڕێوه‌به‌رایه‌تی ڤێرتێرنه‌ری سلێمانی له‌ لیژنه‌ هاوبه‌شه‌كان رایده‌گه‌یه‌نێت: به‌هۆی ده‌ستكاریكردنی لیبڵه‌كانی و درێژكردنه‌وه‌ی ماوه‌ی به‌سه‌رچوونه‌كه‌ی و دوو به‌رواری، له‌لایه‌ن لیژنه‌ هاوبه‌شه‌كانه‌وه‌ ده‌ست به‌سه‌ر ژماره‌یه‌كی زۆر دۆنه‌ر (شاورمه‌)دا گیراوه‌ كه‌ شیاوی خواردن نیه‌.

وتیشی: ژماره‌ی لوله‌ی ئه‌و شاورمه‌ی ده‌ستی به‌سه‌ردا گیراوه‌ زیاتر له‌ 150 دانه‌یه‌، له‌ كارگه‌یه‌كی شاری هه‌ولێر ئاماده‌و هاورده‌ی شاری سلێمانی ده‌كرێت و له‌لایه‌ن كۆمپانیای سیتی شۆڕش له‌ گه‌ڕه‌كی به‌ختیاری، بێ ئاگاداركردنه‌وه‌ی به‌ڕێوه‌به‌رایه‌تی ڤێرتێرنه‌ری سلێمانی ده‌یفرۆشرێت.

راشیگه‌یاند: به‌پێی رێنماییه‌كانی وه‌زاره‌تی بازرگانی عیراق، ده‌ستكاریكردنی لیبڵ و شاردنه‌وه‌ی زانیارییه‌كانی ناوی یان هه‌بوونی دوو لیبڵ له‌سه‌ر كاڵاو شمه‌ك و خوارده‌مه‌نیه‌كان رێگه‌پێدراو نیه‌.

ئاماژه‌ی به‌وه‌شكرد: به‌ فه‌رمانی قائیمقامی سلێمانی و له‌لایه‌ن به‌ڕێوه‌به‌رایه‌تی ڤێرتێرنه‌ری سلێمانیه‌وه‌ سه‌رجه‌میان له‌ناوده‌برێت و خاوه‌نه‌كه‌شی رێكاری پێویستی له‌گه‌ڵ ده‌گیرێته‌به‌ر.

PUKmedia راگه‌یاندنی قائیمقامیه‌تی سلێمانی