فیفا ژماره‌یه‌ك ئۆتۆمبێل بۆ مۆندیال وه‌رده‌گرێت

.

كۆمپانیای كیا مۆتۆرز سپۆنسه‌ری ره‌سمی پاڵه‌وانێتیی جامی جیهانی 2018 كه‌ له‌م چه‌ند رۆژه‌دا له‌ روسیا ئه‌نجام ده‌درێ، 424 ئۆتۆمۆبێلی جۆراوجۆری پێشكه‌ش به‌ رێكخه‌رانی پاڵه‌وانێتییه‌كه‌ كرد به‌ مه‌به‌ستی گواستنه‌وه‌ی یاریزانان و به‌رپرسانی وه‌رزشی و گه‌وره‌ به‌رپرسان.

مه‌راسیمی پێشكه‌شكردنی ئۆتۆمۆبێله‌كان له‌ 31 ی ئایاری رابردوو له‌ یاریگه‌ی لۆزنیكی له‌ مۆسكۆ به‌ڕێوه‌چوو. له‌و یاریگه‌یه‌ یاریی كۆتایی جامی جیهان له‌ 15 ی ته‌مموز به‌ڕێوه‌ده‌چێت. یاریی كردنه‌وه‌ش له‌ 14 ی ئه‌م مانگه‌ له‌نێوان رووسیا و سعوودییه‌ ئه‌نجام ده‌درێت.

ئه‌و ئۆتۆمۆبێلانه‌ی لیژنه‌ی پاڵه‌وانێتییه‌كه‌ له‌ كیا مۆتۆرز وه‌ریانگرت بریتین له‌‌ سپید هاچباك و SUV سپۆرتاج و سۆرینتۆ و كۆریسی سیدانی نایاب.
كیا به‌ ریزێك ئۆتۆمۆبێلی گرانبه‌ها به‌شداری ده‌كات به‌وه‌ی شه‌ریكی ره‌سمی فیفایه‌.

ئاهه‌نگه‌كه‌ به‌ ئاماده‌بوونی جای نییو هاوس سه‌رۆكی به‌شی وه‌رگرتن و مافی بازاڕكاریی یه‌كێتیی تۆپی پێی نێوده‌وڵه‌تی فیفا و ئه‌لێكسی سوروكین سه‌رۆكی ئه‌نجوومه‌نی كارگێڕی و سه‌رۆكی جێبه‌جێكاریی لیژنه‌ی ئاماده‌كاریی ناوخۆی فیفا و نیمانیا فیدیچ ئه‌فسانه‌ی تۆپی پێی سڕبی و یانه‌ی مانچسته‌ر یونایتدی ئینگلیزی به‌ڕێوه‌چوو.

له‌باره‌ی ئه‌مه‌ جای نییو هاوس گوتی: كۆمپانیای كیا مۆتۆرز له‌ ساڵی 2007 ه‌وه‌ سپۆنسه‌ری ره‌سمی یه‌كێتیی تۆپی پێی نێوده‌وڵه‌تییه‌، له‌و كاته‌وه‌ كیا به‌ به‌رده‌وام كۆمه‌ڵێك ئۆتۆمۆبێلمان پێشكه‌ش ده‌كات بۆ هاوكاریكردن له‌ گواستنه‌وه‌ی یاریزانان و به‌رپرسانی وه‌رزشی و گه‌وره‌ به‌رپرسان له‌ پاڵه‌وانێتییه‌كه‌.

ئێمه‌ش به‌ خۆشحاڵییه‌وه‌ سوپاسگوزارین، نییوهاوس روونیكرده‌وه‌: كیا رۆڵێكی گه‌وره‌ و سه‌ركه‌وتووانه‌ له‌ به‌ڕێوه‌بردنی مۆندیال ده‌گێڕێت. هه‌روه‌ها فیفا و كیا مۆتۆرز به‌ یه‌كه‌وه‌ به‌شداری ده‌كه‌ن له‌ پێشكه‌شكردنی خۆشییه‌كانی ئه‌و یارییه‌ جه‌ماوه‌رییه‌ كه‌ یه‌كه‌مه‌ له‌سه‌ر ئاستی جیهان.

له‌ لای خۆیه‌وه‌ جیونگ وون جیۆنگ سه‌رۆكی كۆمپانیای كیا مۆتۆرز له‌ رووسیا وتی: جامی جیهانی 2018 چه‌ند رۆژێكی ماوه‌ ئێمه‌ش هه‌وڵ ده‌ده‌ین خه‌ڵك له‌ لۆگۆی كیا نزیك بكه‌ینه‌وه‌ له‌م رووداوه‌ گه‌وره‌یه‌دا.

PUKmedia له‌ئاژانسه‌كانه‌وه‌