ئەبێ‌ بە ساحێب ماڵ

.

ئەبێ‌ بە ساحێب ماڵ

د.شیركۆ عبدالله‌‌

ـ رەبی ماشەڵـڵای لێ‌ بێت، ئەوە كوڕەكەی فیڕنەگولە بەچی وای لێ‌ هاتووە؟
× چی لێ‌ هاتووە بەگم؟
ـ كەڵەگەت و تێكسمڕاوو چوارشانە..ئەڵێی پەیینیان كردووەتە بنی!
× قوربان گیان ئەوە عائیلەوییەن ریازە ئەكەن.
ـ یاری ئاسن و لەشجوانی؟
× خۆی یاری ئاسن ئەكات بەڵێ‌، بەڵام باوكی خەریكی یۆگایە.
ـ یۆگا؟
× بەڵێ‌ یۆگا، بۆ ئەوەی عەمری درێژ بێ‌.
ـ جا توخوا عەمرێك بە یۆگاكردن و كەرەوزخواردن درێژ ببێ‌، تێی هەڵبەی باشتر نییە؟
× گەورەم هەر كەسە و قەناعەتێكی هەیە.
ـ ئاخر كەڵكی نییە رۆڵە.
× جا بەناشوكریی نەبێ‌ چ شتێك كەڵكی هەیە؟
ـ وانییە..ئێستا مەسەلەن تۆ یەك دنیا كەڵك و مەنفەعەتت هەیە..بەتایبەت بۆ گژوگیا.
× من كەڵك و مەنفەعەتم هەیە بۆ گژوگیا؟!
ـ ئا.. ئەزانی بۆ؟.. چونكە رۆژی سێ‌ چوار سەتڵ غازی دوانۆكسیدی كاربۆن دروست ئەكەی.
× رابوێرە بۆخۆت بەساقەی خواكەت بم.
ـ ئا وس.. لووتم لە بۆنێكی پیس و خەتەرە.
× هیچ نییە ئوستاز.. جەماعەتی بەشی یاسان دیسان پیازو تەماتەیان سووركردووەتەوە..
ـ رۆڵە گیان ئەو بۆنەی من ئەیكەم بۆنی تەماتە و پیازی سووتاو نییە.. بۆنی موئامەرەیە.
× تازە بۆنی ئەكەی؟.. ئەوە خەریكە كۆن ئەبێ‌.
ـ چی بووە تێم گەیەنە؟!
× یەعنی ئاگات لێ‌ نییە؟
ـ تۆم بمرێ‌ نەخێر.
× هەی بێ‌ قەزابی یاخوا.. موئامەرەكان دوان دوانن.
ـ دوان دوان؟
× بەڵێ‌ بەجووت ئەگرن باینجان.. لەولاوە ئاوی دوكان و دیجلەیان لێ‌ گرتووینەتەوە….
ـ ئەی لەملاوە؟
× لەملاشەوە جەندرمەی توركی وا خەریكە لە سۆراندا ئەبێ‌ بە ساحێب ماڵ.