په‌یوه‌ندی بازرگانی و ئابوری سلێمانی و ئێران گه‌شه‌ی پێ ده‌درێت

.

قائیمقامی سلێمانی و به‌رپرسانی كونسوڵگه‌ری كۆماری ئیسلامی ئێران په‌یوه‌ندییه‌ بازرگانی و ئابورییه‌كانی  نێوان پارێزگای سلێمانی و ئێران تاوتوێ ده‌كه‌ن و هه‌ردوولا جه‌خت له‌سه‌ر به‌ره‌ودان به‌و په‌یوه‌ندیانه‌ ده‌كه‌نه‌وه‌.

ئاوات محه‌مه‌د قائیمقامی سلێمانی له‌ دیوانی قائیمقامیه‌ت له‌گه‌ڵ " ئاغای سوری" راوێژكاری ئابوری و "ئاغای ئه‌نوه‌ری حه‌سیب زاده‌" راوێژكاری بازرگانی و پیشه‌سازی له‌ كونسوڵگه‌ری كۆماری ئیسلامی ئێران له‌ سلێمانی كۆبووه‌وه‌.

له‌ كۆبوونه‌وه‌كه‌دا هه‌ردوولا  جه‌ختیان له‌سه‌ر گرنگی به‌ره‌ودان  به‌و په‌یوه‌ندیانه‌ كرده‌وه‌ و رایانگه‌یاند پێشخستنی جموجوڵه‌ ئابوری و بازرگانیه‌كانی نێوان پارێزگای سلێمانی و كۆماری ئیسلامی له‌ به‌رژه‌وه‌ندی هاوڵاتیانی هه‌رێمی كوردستان و كۆماری ئیسلامی ئێراندایه‌و له‌به‌ر ئه‌وه‌ پێویسته‌ گرنگی زیاتریان پێبدرێت ,  قائیمقامی سلێمانی و به‌رپرسانی كونسوڵگه‌ری كۆماری ئیسلامی ئێران له‌ سلێمانی باسیان له‌و كێشه‌و گرفتانه‌شكرد كه‌ له‌ ده‌روازه‌ سنورییه‌كاندا هه‌یه‌و جه‌ختیان له‌سه‌ر به‌زووی چاره‌سه‌ركردنی كۆی گرفت و به‌ربه‌سته‌كان كرده‌وه‌ له‌ پێناو پێشخستنی په‌یوه‌ندییه‌ بازرگانی و ئابورییه‌كان , هه‌روه‌ها   هه‌ردوولا هاوڕابوون له‌سه‌ر پێشكه‌شكردنی هه‌موو جۆره‌ كارئاسانییه‌ك بۆ هاتووچۆی گه‌شتیاران له‌ خاڵه‌ سنورییه‌كان.


PUKmedia راگه‌یاندنی قائیمقامیه‌تی سلێمانی