درۆكان

.

درۆكان

د.شیركۆ عبدالله‌‌

ـ ئەرێ‌ كەلـلەپووت!
× گیانی كەلـلەپووت.
ـ ئەڵێم مودەتێكە فیڕنەگولە كڕە! هیچ دەنگوباسێكی نابیستم. خۆ هیچ نەبووە؟
× نەوەڵـڵا ئەو رۆژە بینیم بسكەی سمێڵی ئەهات.
ـ كام سمێڵەیان؟
× یەعنی چی كام سمێڵەیان؟!
ـ ئاخر ئەو جووتێ‌ سمێڵی دەسكە كەوەریی هەیە.
× قوربان كورتی كردۆتەوە. ئەڵێ‌ تاقەتی مەسئولیاتی سمێڵم نەماوە.
ـ ئای دنیا.. لەچییەوە هاتە سەرچی! جاران تەدەخولی لە هەموو شتێكدا ئەكرد، ئێستا تاقەتی سمێڵی خۆیشی نەماوە؟!
× هەڵبەتە حیكمەتێكی تیایە.
ـ راست ئەكەی. هەڵبەتە حیكمەتێكی تیایە. بەس پێت نەگوتم كام سمێڵەیان بسكەی ئەهات، بەشی لای چەپی یان بەشی لای راستی؟
× دەققەیەك با بیر بكەمەوە.. ئا.. قوربان گیان سمێڵی چەپی بوو بسكەی ئەهات.
ـ دە ئەوە مەعنای وایە كاروباری بازرگانییەكەی روو لە قازانجە. چەپ عیلاقەی بە بازرگانییەوە هەیە.
× ئەی ئەگەر سمێڵی راستی بوایە؟
ـ سمێڵی لای راست عیلاقەی بە سیاسەتەوە هەیە. ئەویش وەكو بیستوومە هەقی بەسەر سیاسەتەوە نەماوە.
× وانییە بەگم. ئەوە من و تۆی پێ‌ ئەخەڵەتێنێ‌ ئەگینا لەژێرەوە هەر خەریكە.
ـ لە ژێرەوە؟
× بەڵێ‌. تیرەكە ئەهاوێژێ‌ و كەوانەكە ئەشارێتەوە.
ـ ئەمە كێ‌ وا ئەڵێ‌؟
× نازانم دیعایەكە زۆر بە قووەتە.
ـ باشە عەیب ناكەی تۆ بە درۆ و بە دیعایە باوەڕ ئەكەی؟
× قوربان خۆت نەسیحەتت كردم… وتت چەلەحانێ‌ و مەلەحانێ‌ مەكە. هەرچییەكت بیست خێرا بڕوا بكە ئەگەر سوور زانیشت درۆیە.
ـ رۆڵە گیان من نەمگو بە هەموو درۆیەك بڕوا بكە.. وتم تەنیا بڕوا بە درۆكانی خۆمان بكە.