ئه‌مریكا دان به‌ ئه‌نجامی ھه‌ڵبژاردنی عیراقدا ده‌نێت

.

وه‌زاره‌تی ده‌ره‌وه‌ی ئه‌مریكا دان به‌ ئه‌نجامی ھه‌ڵبژاردنی ئه‌نجومه‌نی نوێنه‌رانی عیراق ده‌نێت و پێشبینی پێكھێنانی حكومه‌تێكی ئیئتلافی، به‌ به‌شداری زۆربه‌ی لایه‌نه‌كان ده‌كات.

ھیزه‌ر نوێرت وته‌بێژی وه‌زاره‌تی ده‌ره‌وه‌ی ئه‌مریكا له‌كۆنفڕانسێكی رۆژنامه‌نووسیدا رایگه‌یاند: ئیداره‌ی واشنتۆن چه‌ند راپۆرتێكی به‌ده‌ست گه‌یشتووه‌ سه‌باره‌ت به‌ ئه‌نجامدانی ساخته‌كاری له‌چه‌ند وێستگه‌یه‌كی ده‌نگداندا، به‌ڵام كۆمسیۆنی باڵای سه‌ربه‌خۆی ھه‌ڵبژاردنه‌كان سه‌رقاڵی لێكۆڵینه‌وه‌یه‌ له‌باره‌ی بڵاوبوونه‌وه‌ی ئه‌و جۆره‌ راپۆرتانه‌.

وتیشی: ئیداره‌ی وڵاته‌كه‌ی دان به‌ ئه‌نجامی ھه‌ڵبژاردنی ئه‌نجومه‌نی نوێنه‌ران ده‌نێت، به‌مه‌رجێك ئه‌م ھه‌نگاوه‌ له‌به‌رژه‌وه‌ندیی سه‌رخستنی پڕۆسه‌ی سیاسی و گه‌لی عیراقدا بێت.

وته‌بێژی وه‌زاره‌تی ده‌ره‌وه‌ی ئه‌مریكا باسی له‌وه‌شكرد: ھه‌رچه‌نده‌ كۆشكی سپی ئاگاداری ھه‌ڵوێست و بۆچوونی سیاسی موقته‌دا سه‌دری سه‌رۆكی ره‌وتی سه‌دره‌، له‌گه‌ڵ ئه‌وه‌شدا پێشبینی پێكھێنانی حكومه‌تێكی ئیئتلافی ده‌كه‌ن له‌ عیراقدا.

PUKmedia ئاژانسه‌كان