كۆسره‌ت ره‌سوڵ: هه‌موو هه‌وڵێك بۆ خزمه‌تی هه‌ولێر ده‌ده‌ین

.

كۆسره‌ت ره‌سوڵ عه‌لی بۆ كاندیدانی لیستی 162 له‌ هه‌ولێر: هه‌موومان پێشمه‌رگه‌ی یه‌كێتین و ئه‌وه‌ی له‌ به‌رژه‌وه‌ندی یه‌كێتی بێ ده‌یكه‌ین.
كۆسره‌ت ره‌سوڵ عه‌لی رایگه‌یاند: هه‌ر هه‌نگاو و كردارێك له‌ به‌رژه‌وه‌ندی خه‌ڵك و سه‌ركه‌وتنی لیستی 162ی یه‌كێتیی نیشتمانیی كوردستان بێ ده‌یهاوێژن و هه‌موو هه‌وڵ و توانایه‌ك ده‌خه‌نه‌ گه‌ڕ بۆ به‌هێزكردنه‌وه‌ی یه‌كێتی.

ئه‌م وتانه‌ی جێگری سكرتێری گشتی یه‌كێتی نیشتمانی كوردستان ئه‌مڕۆ شه‌ممه‌ 5/5/2018 له‌ شاری هه‌ولێر، له‌میانی كۆبوونه‌وه‌ی له‌گه‌ڵ كاندیدانی لیستی 162 له‌ پارێزگای هه‌ولێر هات.

له‌ سه‌ره‌تای كۆبوونه‌وه‌كه‌دا كۆسره‌ت ره‌سوڵ عه‌لی روو له‌ كاندیدانی لیستی یه‌كێتی كردو وتی: "یه‌كێتی خاوه‌نی قاره‌مان و تێكۆشه‌ر و دڵسۆزی وه‌ك ئێوه‌یه‌ بۆیه‌ به‌رده‌وامه‌و ئاسۆ روونه‌و پێویسته‌ ئێمه‌و ئێوه‌ رۆڵی خۆمان بگێڕین".

جێگری سكرتێری گشتی وتیشی: "یه‌كێتیی نیشتمانیی كوردستان خاوه‌نی دنیایه‌ك سه‌روه‌رییه‌، كه‌ مایه‌ی شانازییه‌ بۆ هه‌موو گه‌لی كورد و ده‌ستكه‌وته‌كانی ئه‌مڕۆ به‌ری ره‌نج و خه‌بات و ماندووبوونی قاره‌مانانی یه‌كێتییه‌.

لای خۆیانه‌وه‌ كاندیدانی لیستی 162ی یه‌كێتیی نیشتمانیی كوردستان دووپاتیان كرده‌وه‌ كه‌ به‌رده‌وامن له‌ كاركردن بۆ سه‌رخستنی لیستی یه‌كێتی نیشتمانی كوردستان و داوایان كرد كه‌ جه‌ماوه‌ر و لایه‌نگر و دڵسۆزانی یه‌كێتی متمانه‌یان پێ ببه‌خشن".

له‌كۆتایی دیداره‌كه‌دا كۆسره‌ت ره‌سوڵ عه‌لی وتی: هه‌ولێر لای ئێمه‌ پیرۆزه‌و یه‌كێكه‌ له‌ شاره‌ هه‌ره‌ سه‌ره‌كییه‌كان، بۆیه‌ هه‌موو هه‌وڵ و توانایه‌كمان ده‌خه‌ینه‌گه‌ڕ بۆ سه‌ركه‌وتن له‌ هه‌ولێری قه‌ڵاو مناره‌و خزمه‌تكردنی هه‌ولێر و هه‌ولێرییه‌كان له‌سه‌ر ده‌ستی یه‌كێتیی نیشتمانیی كوردستان".

PUKmedia راگه‌یاندنی جێگری سكرتێری گشتی