لاهوری شێخ جه‌نگی: یه‌كێتی نه‌یهێشت دوو ئیداره‌یی دروست ببێته‌وه‌

.

لاهور شێخ جه‌نگی ڕایگه‌یاند: ئه‌گه‌ر یه‌كێتی له‌ حكومه‌تی هه‌رێم بكشابایته‌وه‌ دوو ئیداره‌یی دروست ده‌بوو، بۆیه‌ یه‌كێتی باجی دا هه‌تا دوو ئیداره‌ی له‌هه‌رێم دروست نه‌بێت.

به‌یانی ئه‌مڕۆ 4-5-2018 لاهور شێخ جه‌نگی و حاكم قادر حه‌مه‌جان هه‌ڵمه‌تی بانگه‌شه‌كانی لیستی 162 ی یه‌كێتیی نیشتمانیی كوردستان له‌ شارۆچكه‌ی پیره‌مه‌گروون-یان به‌سه‌ر كرده‌وه‌.

حاكم قادر حه‌مه‌ جان ئه‌ندامی مه‌كته‌بی سیاسی یه‌كێتیی نیشتمانیی كوردستان و سه‌رپه‌رشتی مه‌ڵبه‌ندی یه‌ك- ی ڕێكخستنی سلێمانی ڕایگه‌یاند: نابێت كه‌س فریوی دروشمی بریقه‌داری هه‌ندێك لایه‌ن بخۆن كه‌ هیچیان له‌ده‌ست نایه‌ و ته‌نها یه‌كێتی ده‌توانێت هه‌نگاو به‌ره‌و سه‌ركه‌وتن بنێت و یه‌كێتی له‌شاخ و شار خه‌باتی كردووه‌ و ئه‌مجاره‌ش یه‌كێتی خه‌باتی مه‌ده‌نی و خه‌باتی په‌رله‌مانی ده‌كات.

وتیشی: یه‌كێتی حزبێكی مه‌ده‌نی و شارستانییه‌ هه‌روه‌ك چۆن له‌شار و شاخ له‌هیچ هه‌وڵێك درێغی نه‌كردووه‌ ئاواش له‌ خه‌باتی په‌رله‌مانی و خه‌باتی مه‌ده‌نیدا درێعی ناكات.

ئه‌و ئه‌ندامه‌ی مه‌كته‌بی سیاسی یه‌كێتی وتیشی: یه‌كێتی 20 هه‌زار شه‌هیدی داوه‌ بۆ ئه‌وه‌ی ئێوه‌ به‌ ئازادی و سه‌ربه‌ستی بژین و شه‌ڕی نه‌ته‌وه‌یی و شه‌ڕی نیشتمانی ته‌نها به‌ یه‌كێتی كراوه‌ و ده‌كرێت.

حاكم قادر ئاماژه‌ی به‌وه‌شكرد كه‌ لیستی 162 لیستی كه‌سوكاری ئه‌نفاله‌، ئه‌و ئه‌نفاله‌ی كه‌ نه‌یتوانی ئیراده‌ی گه‌له‌كه‌مان و ئیراده‌ی یه‌كێتی بكشێنێت.

یه‌كێتی حزبی كۆمه‌ڵانی خه‌ڵكی كوردستانه‌ و ڕۆژی ده‌نگدان ده‌نگ به‌ لیستی 162 لیستی سه‌رۆك مام جه‌لال و لیستی شه‌هیدان بده‌ن.

دواتر لاهۆری شێخ جه‌نگی وتارێكی كورتی پێشكه‌ش كرد و ڕایگه‌یاند: ئه‌وه‌ یه‌كێتی بوو كه‌ هه‌ولێری له‌ داعش پاراست، ئه‌وه‌ یه‌كێتی بوو كه‌ خه‌ونی نه‌یارانی له‌ كۆبانێ له‌ گۆڕنا، ئه‌وه‌ پێشمه‌رگه‌كانی یه‌كێتی بوون كه‌ گورزیان له‌ داعش وه‌شاند.

وتیشی: پیلانێك له‌دژی كوردستان و یه‌كێتی به‌ڕێوه‌یه‌ كه‌ ده‌بێت یه‌كێتییه‌كان وشیار بن.

لاهوری شێخ جه‌نگی ئاماژه‌ی به‌وه‌شدا كه‌ ئه‌م هه‌ڵبژاردنه‌ جیاواز و چاره‌نووسسازه‌ و هه‌موو كێشه‌كان له‌چوارچێوه‌ی ده‌ستووری عیراق چاره‌سه‌ر ده‌كرێن و ئه‌مجاره‌ له‌م هه‌ڵبژاردنه‌دا دوو سه‌ركرده‌ی گه‌وره‌مان له‌گه‌ڵدا نییه‌ ئه‌ویش سه‌رۆك مام جه‌لال و كاك نه‌وشیروان مسته‌فایه‌، دوو سه‌ركرده‌ كه‌ ڕۆڵیان هه‌بووه‌ له‌ نووسینه‌وه‌ی ده‌ستوور له‌ به‌غدا، دوو سه‌ركرده‌ كه‌ ده‌یانتوانی له‌ به‌غدا یه‌كلایی كه‌ره‌وه‌ بن و كۆكه‌ره‌وه‌ی هه‌موو لایه‌نه‌كان بن.

وتیشی: ئه‌گه‌ر یه‌كێتی له‌ حكومه‌تی هه‌رێمی كوردستان بكشابایه‌ته‌وه‌ دوو ئیداره‌ی دروست ده‌بوو و یه‌كێتی باجی ئه‌وه‌ی دا كه‌ ئه‌م دوو ئیداره‌ییه‌ دروست نه‌بێت و له‌ ئێستادا كاتی یه‌كده‌نگی و یه‌كڕیزییه‌ و ڕۆژی ده‌نگدان ده‌نگ به‌ لیستی 162 لیستی سه‌رۆك مام جه‌لال و لیستی شه‌هیدان بده‌ن.

PUKmedia تایبه‌ت