هونه‌رمه‌ندێكی كورد له‌ قاهیره‌ خه‌ڵاتكرا

.

هه‌ندرێن خۆشناو یه‌كێكه‌ له‌ هونه‌رمه‌نده‌ پێشه‌نگ و دیاره‌كانی بواری هونه‌ری كاریكاتێر و كارتۆن له‌ كوردستاندا، به‌ڵكو له‌ جیهانیشدا، ساڵانێكه‌ به‌بێ وچان له‌م بواره‌دا كارده‌كات و چه‌ندین پێشانگای تایبه‌تی و چه‌ندین پێشانگای هاوبه‌شی كاریكاتێریی له‌ ناوه‌وه‌ و ده‌ره‌وه‌ی كوردستان به‌شداریكردووه‌، كاره‌كانیشی له‌ زۆربه‌ی رۆژنامه‌ و گۆڤاره‌كانی كوردستان بڵاوكردۆته‌وه‌.

له‌ دوایین چالاكی خۆی كه‌ بەشداریکردن بوو لە پێنجەمین دیداری کارتۆنی قاهیرە، کە لە رۆژانی 15 _ 25 ی مانگی ئه‌پریل لە کۆشکی هونەر لە خانەی ئۆپێرا سازکرا، ئەم هونەرمەندە کوردە خەڵاتێکی ئەم دیدارە نێودەوڵەتیەی پێبەخشرا.

هەندرێن خۆشناو سەبارەت بەم خەڵاتە نێودەوڵەتیە گوتی: ئەمە سێیەم جاره‌ له‌م فێستیڤاڵە كاریكاتێرییه‌ی قاهیرە بەشداری بکەم، ئەم دیدارە بریتیە لە پڕبایەخترین و گەورەترین فێستیڤاڵی کاریکاتێریی کە لە میسردا ساڵانە سازبکرێت، کارەکانیش دابەشکرابوون بەسەر دوو تەوەردا وەرزش و تەوەری ئازاد.

جێی دڵخۆشی و شانازییە کە لە نێو (650) تابلۆی کاریکاتێریی و کارتۆنی (350) هونەرمەند لە (68) وڵاتەوە، خەڵاتێکی رێزلێنان بە هونەرمەندێکی کورد ببەخشرێت، من بە سێ کارتۆنی وەرزشی و دوو کارتۆنی ئازاد بەشداریم کردبوو، خەڵاتی رێزلێنانەکەش لە بواری وەرزشیەکە پێمبەخشرا، هەرچەندە کە جێی دڵخۆشیه‌ كاتێك كه‌ کارەکانم بە لێژنە هونەرییەکاندا سەرکەوتووانە تێپەڕده‌بن و رەتناکرێنەوە و لە پێشانگای نێودەوڵەتیەکاندا نمایش ده‌کرێن لەتەک کاری هونەرمەندە جیهانیەکاندا، کە خەڵاتیش بکرێین هەڵبەتە ئه‌و دڵخۆشکەرترە، و هەست دەکەم کەوا ئەو جۆرە خەڵاتانە تەنیا بۆ من نیە، بەڵکو بۆ هەموو هونەرمەندانی کوردستانە.

PUKmedia تایبه‌ت