قوباد تاڵه‌بانی: هه‌ندێك لایه‌ن بۆ په‌رده‌پۆشكردنی گه‌نده‌ڵییه‌كانیان هێرش ده‌كه‌نه‌ سه‌ر یه‌كێتی

.

ئه‌مڕۆ 28-4-2018، به‌ مه‌به‌ستی پاڵپشتی له‌ ھه‌ڵمه‌ته‌كانی بانگه‌شه‌ی لیستی 162 ی یه‌كێتیی نیشتمانیی كوردستان، قوباد تاڵه‌بانی له‌ به‌رده‌م لایه‌نگرو جه‌ماوه‌ری یه‌كێتی له‌ قه‌زای پێنجوێن كۆبووه‌وه‌و له‌ وته‌یه‌كیشدا رایگه‌یاند: یه‌كێتیی نیشتمانیی كوردستان له‌به‌رده‌م پیلانی ناحه‌زانیدایه‌، بۆیه‌ ده‌بێت به‌هیچ شێوه‌یه‌ك نه‌هێڵین پیلانی ناحه‌زان و دوژمنانی یه‌كێتی سه‌ربگرێت به‌ره‌و رووی ده‌وه‌ستینه‌وه‌، كه‌ ئه‌وه‌ش به‌سه‌ر خستنی لیستی 162 ی یه‌كێتیی نیشتمانیی ده‌بێت له‌ هه‌ڵبژاردندا.

قورباد تاڵه‌بانی راشیگه‌یاند: لیستی 162 لیستی سه‌رۆك مام جه‌لاله‌ لیستی خوێنی شه‌هیدانه‌، لیستی ئه‌و جه‌ماوه‌ره‌ نیشتمان په‌روه‌ره‌ی گه‌له‌كه‌مانه‌ بۆیه‌ به‌سه‌رخستنی ئه‌و لیسته‌ تیمێكی به‌هێزی وا ده‌نێرینه‌ به‌غدا كه‌ شه‌ڕی ده‌ستورو مافه‌كانمان ده‌كه‌ن له‌وێ.

هه‌روه‌ها وتی: لیستی 162 كارده‌كات بۆ بۆ چه‌سپاندنی ئاشتی كۆمه‌ڵایه‌تی كه‌ یه‌كێتی له‌ سه‌رهه‌ڵدانییه‌وه‌ هه‌وڵی بۆ ده‌دات و خه‌باتی بۆ كردوه‌، وتیشی: یه‌كێتیی نیشتمانیی كوردستان هێزێكی تۆكمه‌ی جه‌ماوه‌ری هه‌یه‌و به‌ره‌و رووی سه‌رجه‌م پیلان و هێرشه‌كان ده‌وه‌ستێته‌وه‌، وه‌ڵامدانه‌وه‌ی ئه‌و هێرش و پیلانانه‌ به‌ ده‌نگدان به‌ لیستی 162 ی یه‌كێتی ده‌بێت بۆیه‌ پێویسته‌ هه‌موومان رۆژی ده‌نگدان بچینه‌ سه‌ر سندوقه‌كانی ده‌نگدان و ده‌نگ به‌ لیستی 162 ی یه‌كێتی بده‌ین، بۆئه‌وه‌ی تیمێكی به‌هێز بنێرینه‌ به‌غدا بۆ ئه‌وه‌ی شه‌ڕی ده‌ستورو مافه‌كانمان بكه‌، شه‌ڕ بكه‌ن بۆ ئه‌وه‌ی به‌غدا بودجه‌یه‌كی نادادپه‌روه‌رانه‌ به‌سه‌ر هه‌رێمدا نه‌سه‌پێنێت.

وتیشی: راسته‌ گلی و گازنده‌ هه‌یه‌و ناعه‌داله‌تی تا{ادده‌یه‌ك هه‌بووه‌، به‌ڵام ده‌بێت ئه‌مڕۆ ئه‌وانه‌ وه‌لابنێین و بچینه‌ سه‌ر سندوقه‌كانی ده‌نگدان و گله‌ی و ره‌خنه‌كانمان بخه‌ینه‌ دوای هه‌ڵبژاردن و ده‌نگ به‌ لیستس 162 ی یه‌كێتی بده‌ین.

له‌ كۆتایی قسه‌كانیدا ئاماژه‌ی به‌وه‌دا، هه‌ندێك لایه‌ن و ناحه‌زی یه‌كێتی بۆ په‌رده‌پۆشكردنی گه‌نده‌ڵییه‌كانیان هێرشی ناڕه‌وا ده‌كه‌نه‌ سه‌ر یه‌كێتی، ئێمه‌ پێیان ده‌ڵێین پیلان و هێرشه‌كانتان پوچ و بێ سود ده‌بێت ئه‌وه‌ یه‌كێتییه‌ كه‌ خاوه‌نی جه‌ماوه‌رێكی دڵسۆزو به‌ ئه‌مه‌ك و نیشتمان په‌روه‌ره‌و هۆشیاره‌و هه‌موو راستییه‌كان ده‌بینێت و ده‌زانێت.

PUKmedia تایبه‌ت