عومه‌ر فه‌تاح: یه‌كێتی به‌ گه‌رمیانه‌وه‌ یه‌كێتیه‌

.

سه‌رله‌به‌یانی ئه‌مرۆ 27-4-2018 عومه‌ر فه‌تاح به‌ ئاماده‌بوونی حه‌مه‌ قاشتی و حاجی قادر نه‌مه‌لی ئه‌ندامانی ئه‌نجومه‌نی ناوه‌ندی پێشوازی كرد له‌ به‌كری حاجی ره‌فعه‌ت كه‌سایه‌تی كۆمه‌ڵایه‌تی و سه‌رۆك عه‌شیره‌تی ته‌رخانی له‌هۆزی جاف.

عومه‌ر فه‌تاح رۆڵی تیره‌ی ته‌رخانی و جافی به‌گشتی له‌ قوربانیدان و خه‌بات بۆ ڕزگاری كوردستان به‌رزنرخاند و رایگه‌یاند: ئێمه‌ هه‌میشه‌ شانازی به‌ئێوه‌و شه‌هید و ئه‌نفالكراو و قوربانیه‌كانتانه‌وه‌ ده‌كه‌ین و یه‌كێتی خۆی به‌خاوه‌نی ئێوه‌ ده‌زانێت، ئێوه‌ش خاوه‌نی یه‌كێتین، یه‌كێتی به‌گه‌رمیانه‌وه‌ یه‌كێتییه‌.

عومه‌ر فه‌تاح وتیشی:  ئێمه‌ شاهیدی مێژوویین، كه‌ گه‌رمیان له‌ تاوانه‌كانی ئه‌نفالدا چ قوربانیه‌كی گه‌وره‌ی داو تووشی چ نه‌هامه‌تیه‌ك هات، بۆیه‌ یه‌كێتی باشتر له‌ ئازاره‌كانی گه‌رمیان ده‌گات.

ئاماژه‌ی به‌وه‌شدا مانه‌وه‌و گه‌شه‌كردنی ئه‌زموونی هه‌رێمی كوردستان و داهاتوو و چاره‌نووسی گه‌لی كوردستان به‌نده‌ به‌ به‌هێزبوون و گه‌شه‌كردنی یه‌كێتی –یه‌وه‌.

لایخۆشیه‌وه‌ به‌كری حاجی ره‌فعه‌ت سه‌رۆكی عه‌شیره‌تی ته‌رخانی به‌ڵینی خۆی و عه‌شیره‌ته‌كه‌ی دووپات كرده‌وه‌ بۆ سه‌رخستنی لیستی ژماره‌ 162ی یه‌كێتی.

  هه‌روه‌ها رایگه‌یاند: ئێمه‌ قوربانیمان داوه‌ له‌ ناو یه‌كێتی دا، له‌ شه‌هیدی سه‌نگه‌رو ئه‌نفالكراوه‌كاندا، تووشی نه‌هامه‌تیی زۆر هاتوون، بۆیه‌ هه‌رگیز رێبازه‌كه‌ی یه‌كێتی به‌رناده‌ین.

PUKmedia