شاڵاو كۆسره‌ت: بۆ سه‌رخستنی لیستی ١٦٢ یه‌ك ده‌نگ و یه‌ك هه‌ڵوێست بین

.

له‌ سه‌ردانێكدا ئه‌مڕۆ 21-4-2018 شاڵاو كۆسره‌ت ره‌سوڵ ئه‌ندامی سه‌ركردایه‌تی و لێپرسراوی مه‌ڵبه‌ندی 3ی رێكخستنی هه‌ولێر، نوسینگه‌ی هه‌ولێری مه‌كته‌بی رێكخستنی به‌سه‌ركرده‌وه‌. له‌لایه‌ن ئه‌ندامانی مه‌كته‌بیشه‌وه‌ پێشوازیكرا.

لای خۆیه‌وه‌ شاڵاو كۆسره‌ت ره‌سوڵ سوپاسی ئاماده‌بوونی ئه‌ندامانی مه‌كته‌بی كردو وتی: ئێوه‌ درێژه‌پێده‌ری خه‌باتی شاخن، بۆیه‌ خۆم به‌ خۆشحاڵ ده‌زانم له‌گه‌ڵ ئێوه‌ كاربكه‌م و ببنه‌ رێنیشانده‌رم، هه‌روه‌ها وتی: سه‌ركه‌وتنی من له‌ كاره‌كانمدا په‌یوه‌سته‌ به‌ هاوكاری و هه‌ماهه‌نگی ئێوه‌، چونكه‌ هه‌مووتان خه‌باتگێڕی به‌ئه‌زمونن له‌كایه‌ی سیاسی له‌نێو یه‌كێتیی نیشتمانیی كوردستان.

دواتر ئاماده‌بووانی كۆبوونه‌وه‌كه‌ به‌ڵێنیاندا كه‌ هاوكارو پاڵپشتی مه‌ڵبه‌ندی 3ی رێكخستنی هه‌ولێرو شاڵاو كۆسره‌ت ره‌سوڵ بكه‌ن و به‌ له‌ خۆبووردوییه‌وه‌ كاربكه‌ن بۆ سه‌رخستنی لیستی 162ی یه‌كێتیی نیشتمانیی كوردستان و گه‌ڕانه‌وه‌ی ده‌ستكه‌وته‌كان و به‌ده‌ستهێنانه‌وه‌ی ئاینده‌.

له‌ ته‌وه‌رێكی تری قسه‌كانیدا شاڵاو كۆسره‌ت ره‌سول وتی: ده‌بێت له‌مه‌ودوا هه‌موومان هه‌ست به‌و به‌رپرسیاریه‌ت و ئه‌ركه‌ قورسه‌ بكه‌ین كه‌ ئێستا له‌سه‌رشانمانه‌، بۆیه‌ ده‌بێت بۆ سه‌رخستنی لیستی ١٦٢ی یه‌كێتیی نیشتمانیی كوردستان یه‌ك ده‌نگ و یه‌ك هه‌ڵوێست بین.

هه‌ر هه‌مان رۆژ شاڵاو كۆسره‌ت ره‌سوڵ سه‌ردانی كۆمیته‌ی (8)ی رێكخستنی هه‌ولێری كردو له‌ دانشتنێكدا ئاسۆ ئیسماعیل شوكر به‌ناوی لێپرسراوی كۆمیته‌و ئه‌نجومه‌نی كۆمیته‌كه‌یان به‌خێرهاتنی هه‌ڤاڵ لێپرسراوی مه‌ڵبه‌ندی كردو خۆشحاڵی خۆی ده‌ربری به‌و سه‌ردان و به‌سه‌ركردنه‌وه‌یان، دواتر له‌ كۆبوونه‌وه‌یه‌كدا لێپرسراوی مه‌ڵبه‌ند له‌نزیكه‌وه‌ گوێی له‌ داواكاری و راو پێشنیاره‌كانیان گرت و وتی: له‌نزیكه‌وه‌ به‌دواداچوون بۆ داواكاری و ڕاو پێشنیاره‌كانتان ده‌كه‌م.

هه‌روه‌ها ئێواره‌ی ئه‌مڕۆ شاڵاو كۆسره‌ت ره‌سوڵ پێشوازی له‌ ستافی ته‌له‌فزیۆنی گه‌لی كوردستان كه‌ناڵی هه‌ولێر كردو پیرۆزبایی و پشتیوانی خۆیان بۆ شاڵاو كۆسره‌ت ره‌سوڵ ده‌ربڕی و له‌هه‌مانكاتدا لێپرسراوی مه‌ڵبه‌ند به‌ڵێنیدا هه‌ماهه‌نگ بێت له‌گه‌ڵیاندا بۆ چاره‌سه‌ركردنی پێشنیارو داواكاریه‌كانیان.

شیاوی باسه‌، هه‌ر ئه‌مڕۆ ژماره‌یه‌كی به‌رچاو له‌ چین و توێژه‌كانی كۆمه‌ڵانی خه‌ڵكی كوردستان و لایه‌نگرانی یه‌كێتیی نیشتمانیی كوردستان بۆ گه‌یاندنی په‌یامی پیرۆزبایی و پاڵپشتی سه‌ردانی (شاڵاو كۆسره‌ت ره‌سوڵَ)یان له‌ باره‌گای مه‌ڵبه‌ندی 3ی رێكخستنی هه‌ولێر كرد.

PUKmedia تایبه‌ت