ئارێز عەبدوڵا: شێواندنی پۆستەرەكان زیان بە یەكێتی ناگەیەنێت

.

بەمەبەستی سیاسی و بۆ زیانگەیاندن بە هەڵمەتی بانگەشەی هەڵبژاردنی یەكێتیی نیشتمانیی كوردستان، لە زۆربەی شارو شارۆچكەكان پۆستەر و وێنەی بانگەشەی  كاندیدەكانی یەكێتی دەشێوێنرێت، كاندیدێكی یەكێتیش رایدەگەیەنێت، ئەو كارە نەشیاوانە هیچ زیانێك بە یەكێتی و ئەنجامەكانی هەڵبژاردن ناگەیەنن.

ئارێز عەبدوڵا كاندیدی ژمارە 2 لەسەر لیستی162 لە پارێزگای هەولێر بە PUKmedia ی راگەیاند:  ئەو كارە كارێكی ناشارستانییە و تەنها لەئەنجامدەرانی دەوەشێتەوە، بە بڕوای من بەمەبەستی سیاسی و لابردنی ژمارەو روخساری كاندیدەكان ئەنجامدەدرێت، تا لەبەرچاوی هاووڵاتیان نەبن.

وتیشی: ئەو كارە لەهەر شار و قەزا و ناحیەیەك ئەنجامبدرێت پێویستە دەسەڵات رێگرییان لێبكات،هەموو ئەو كەسانەش دڵنیا دەكەمەوە ئەو كارە نە زیان بە یەكێتی و نە بە كاندیدەكانی دەگەیەنێت و هیچ كاریگەرییەكی لەسەر ئەنجامەكانی هەڵبژاردن نابێت.

ئەمەش لە كاتێكدایە لەسەرەتای دەستپێكردنی بانگەشەی هەڵبژاردنەوە لە پارێزگای هەولێر و چەند شارو شارۆچكەیەك هەوڵی شێواندن و دڕاندنی پۆستەرەكانی یەكێتیی نیشتمانیی كوردستان دەدرێت و لە تۆڕە كۆمەڵایەتییەكانیش چەند وێنەیەك لەسەر ئەو بابەتە بڵاوبووەتەوە.

PUKmedia   تاژاو محەمەد