گەشتوگوزارو شوێنەوار لە وەزارەتی شارەوانی جیادەكرێنەوە

هەرێم بەپێی پرۆتۆكۆڵ‌و رێككەوتنە نێودەوڵەتییەكان كار دەكات

پێش نیوەڕۆی ئەمڕۆ چوار شەممە 22 ی ئایاری 2013 بە سەرۆكایەتی نێچیرڤان بارزانی سەرۆك وەزیرانی هەرێمی كوردستان‌و بە ئامادەبوونی عیماد ئەحمەد جێگری سەرۆك وەزیران، كۆبوونەوەی ئەنجومەنی وەزیران ساز كرا.

لە سەرەتای كۆبوونەوەكەدا یاسای هەمواركردنی وەزارەتی شارەوانی‌و گەشتوگوزاری ژمارە 12 ی ساڵی 2010 و یاسای دەستەی گشتی گەشتوگوزار لە هەرێمی كوردستان گفتوگۆی لەسەر كراو دوای خستنەڕووی چەندین تێبینی، بڕیاردرا لیژنەیەكی تایبەت پێكبهێنرێت بەمەبەستی دەوڵەمەند كردنی پڕۆژە یاساكەو لێكۆڵینەوە لە چۆنیەتی جیاكردنەوەی گەشتوگوزارو شوێنەوار لە وەزارەتی شارەوانی.

دوای ئەوە ئەنجومەنی وەزیران كۆنووسی لیژنەی پێكهێنراو لەلایەن ئەنجومەنی وەزیرانەوە‌ بۆ دانانی میكانیزم بۆ كاری كونسوڵگەرییە بیانییەكان لە هەرێمی كوردستانی تاوتوێ‌و گفتوگۆكردو پەسەند كرا.

بەو پێیەش كە هەرێمی كوردستان لە چوارچێوەی دەوڵەتی عیراقی فیدراڵدایەو عیراقیش ئەندامی رێككەوتننامە نێودەوڵەتیەكانی پەیوەندییە دیپلۆماسیەكانە، مامەڵەو رەفتارو ئەرك‌و مافەكانی ستافە دیپلۆماسیەكانی نوێنەرایەتی‌و كونسوڵگەرییەكانی وڵاتە بیانییەكان لە هەرێمی كوردستان بەپێی پرۆتۆكۆڵ‌و رێككەوتنە نێودەوڵەتییەكان دەبێت.

PUKmedia راگەیاندنی ئەنجومەنی وەزیران