سه‌ربازه‌ رفێندراوه‌كانی میسر ئازادكران

سه‌ربازه‌كان به‌بێ دانوستان ئازادكران

دوای ئه‌وه‌ی هه‌فته‌ی رابردوو حه‌وت سه‌ربازی سوپای میسر له‌ناوچه‌ی سینا رفێندران، ئه‌مڕۆ 22-5، وته‌بێژی هێزه‌ چه‌كداره‌كانی ئه‌و وڵاته‌، هه‌واڵی ئازادكردنی رفێندراوه‌كانی راگه‌یاند.
وته‌بێژه‌كه‌ی هێزه‌ چه‌كداره‌كانی میسر، له‌ لاپه‌ڕه‌ی تایبه‌تی خۆی له‌ تۆڕی كۆمه‌ڵایه‌تی فه‌یسبوك نوسیویه‌تی: هه‌ر حه‌وت رفێندراوه‌كه‌ ئازادكراون و به‌ڕێگاوه‌ن بۆ قاهیره‌.
ئاماژه‌ی به‌وه‌شكردووه‌، پرۆسه‌ی رزگاركردنه‌كه‌ به‌هه‌وڵی ده‌زگای هه‌واڵگری میسرو هاوكاری سه‌رۆك هۆزه‌كانی سینا ئه‌نجامدراوه‌.
تائێستاش وێنه‌ی ئه‌و سه‌ربازانه‌ بڵاونه‌كراوه‌ته‌وه‌و هێزه‌ ئه‌منییه‌كانی میسریش هیچ روونكردنه‌وه‌یه‌كیان له‌باره‌ی چۆنییه‌تی ئازادكردنیان بڵاونه‌كردۆته‌وه‌.

به‌ره‌به‌یانی رۆژی پێنجشه‌ممه‌ی رابردوو، گروپێكی چه‌كدار له‌ناوچه‌ی دۆڵی سه‌وز له‌ رۆژهه‌ڵاتی شاری عریش-ی ناوچه‌ی سینا، حه‌وت سه‌ربازی میسرییان رفاندو به‌ره‌و شوێنێكی نادیاریان بردن، له‌كاردانه‌وه‌ی ئه‌و رووداوه‌ش دا هێزه‌كانی میسر ناوچه‌ سنوورییه‌كانیان له‌گه‌ڵ كه‌رتی غه‌ززه‌ كۆنتڕۆڵكردو ده‌روازه‌ سنوورییه‌كانیشیان بۆماوه‌ی چه‌ند رۆژێك داخست.
له‌كاتی بڵاوبوونه‌وه‌ی هه‌واڵی رفاندنه‌كه‌ش، ده‌نگۆی ئه‌وه‌ بڵاوبۆوه‌ كه‌ گروپه‌ رفێنه‌ره‌كه‌ توانیوانه‌ سه‌ربازه‌ رفێندراوه‌كان بۆناو خاكی غه‌ززه‌ بگوازنه‌وه‌.
پێشتریش رۆژنامه‌یه‌كی میسری له‌زاری وه‌زیری ناوخۆی ئه‌و وڵاته‌وه‌ بڵاویكردبۆوه‌، هیچ دانوستانێك له‌گه‌ڵ رفێنه‌راندا ناكه‌ین بۆ ئازادكردنی سه‌ربازه‌ رفێندراوه‌كان، هۆشداریشی دابوو له‌ به‌كارهێنانی هێزی سه‌ربازی بۆ ئازادكردنیان.

PUKmedia ئاژانسه‌كان