مەلا بەختیار: پەرواز توانی هونەری كوردی بەجیهانی عەرەبی بناسێنێت

دەنگدان بەپەرواز بەئەركی هونەریی‌و نەتەوەیی‌و بزانن

لێپرسراوی دەستەی كارگێڕی مەكتەبی سیاسی یەكێتیی نیشتمانیی كوردستان پێشوازی لەهونەرمەندی گۆرانیبێژ گۆران ساڵح، هاوسەری بەهرەمەند پەرواز حسێن كردو لەدیدارێكیشدا، رایگەیاند: "داوا لەهەموو نەتەوەی كوردو دۆستانی كوردیش دەكەم، لەهەر كوێیەك بن، دەنگدان بەپەرواز، بەئەركی هونەریی‌و نەتەوەیی‌و گۆرانی رەسەنی كوردەواری بزانن ".

هەر لەو دیدارەدا، كە ئەمڕۆ 2013/5/21، لەشاری هەولێر بەڕێوەچوو، مەلا بەختیار لێپرسراوی دەستەی كارگێڕی، ئاماژەی بۆ ئەوەكرد كە لەبەرنامەی "عەرەب ئایدڵ" دا، پەرواز توانی لەدەروازەیەكی گەورەی هونەرییەوە، لەجیهانی جوانكارییەوە، ئاستی جوانی هونەری كوردی لەبەرامبەر هونەری نەتەوەی عەرەب، كە مێژویەكی دێرینی هونەریی‌و 22 دەوڵەت‌و سەدان دەزگاو ستۆدیۆی هونەری‌و دەیان كەناڵی ئاسمانی تایبەت بەهونەریان هەیە، پەرواز بەسەر هەموو ئەمانەدا لەپەروازدا "فرین" توانی بیسەلمێنێ‌، هەركاتێك بوار بۆ بەهرەمەندی كورد بڕەخسێ‌، دەتوانێ‌ پێشكەوتنی گەورە بەدەست بهێنێت.

مەلا بەختیار، لەدرێژەی دیدارەكەشیدا، لەگەڵ هونەرمەند گۆران ساڵح، ئاماژەی بۆ ئەوەشكرد: "بەناوی یەكێتی‌و تەواوی رێكخراوە دیموكراتییەكانییەوە، سەندیكاو دۆستانییەوە، پیرۆزبایی لەپەرواز دەكەین".

وتیشی: داوا لەهەموو نەتەوەی كوردو دۆستانی كوردیش دەكەم لەهەر كوێیەك بن، دەنگدان بەپەرواز بەئەركی هونەریی‌و نەتەوەیی‌و گۆرانی رەسەنی كوردەواری بزانن، بۆیە داوامان وایە دەنگ بدەن بەپەرواز.

مەلا بەختیار، راشیگەیاند: "ئەم دەنگدانە هەم خزمەتی هونەرەو هەم كوردایەتیشە لەبواری هونەردا".

PUKmedia راگەیاندنی لێپرسراوی دەستەی كارگێڕی