خێزانه‌كه‌ی حه‌سه‌ن زیره‌ك سه‌ردانی عیماد ئه‌حمه‌د ده‌كات

په‌یكه‌رێك بۆ زیره‌ك دروستده‌كرێت

ئه‌مڕۆ 20-5 عیماد ئه‌حمه‌د جێگری سه‌رۆكی حكومه‌تی هه‌رێمی كوردستان له‌ته‌لاری ئه‌نجومه‌نی وه‌زیران چاویكه‌وت به‌ رابه‌خان-ی خێزانی هونه‌رمه‌ندی ناسراو حه‌سه‌ن زیره‌ك.
له‌ دانیشتنێكدا كه‌ هونه‌رمه‌ند بورهان خۆشناو ئاماده‌ی بوو، جێگری سه‌رۆكی حكومه‌ت وێڕای به‌خێرهێنانی، رۆڵی هونه‌رمه‌ندی نه‌مر حه‌سه‌ن زیره‌كی له‌بواری خزمه‌تكردنی هونه‌رو گۆرانی به‌رزنرخاندو رایگه‌یاند: حكومه‌تی هه‌رێمی كوردستان به‌خششی هونه‌ری ئه‌و هونه‌رمه‌نده‌ نه‌مره‌ له‌ به‌رچاو ده‌گرێت و به‌هونه‌رمه‌ندی داهێنه‌رو به‌ئه‌زمونی كوردی وه‌سفكرد، كه‌ توانی له‌سه‌رده‌مانێكدا هونه‌رو گۆرانی كوردی به‌پارێزراوی و ره‌سه‌نایه‌تی په‌ره‌ پێبدات و له‌و قۆناغه‌دا جێ په‌نجه‌ی دیاربوو.
له‌ به‌رامبه‌ردا رابه‌خان خێزانی هونه‌رمه‌ند حه‌سه‌ن زیره‌ك زۆر سوپاسی جێگری سه‌رۆكی حكومه‌تی كرد بۆ ئه‌و پێشوازیه‌ گه‌رمه‌و گرنگیدانی حكومه‌ت و لایه‌نی په‌یوه‌ندیداری به‌هونه‌رو هونه‌رمه‌ندان به‌وه‌فاداری حكومه‌ت وه‌سف كردو وتی: جێی خۆیه‌تی سوپاسی ئێوه‌ بكه‌م ده‌رفه‌تتان بۆ ره‌خساندم، ئه‌مه‌ نیشانه‌ی وه‌فاداری ئێوه‌یه‌ بۆ هونه‌رمه‌ندو خانه‌واده‌كانیان، هه‌روا داوایكرد كه‌ حكومه‌ت په‌یكه‌رێك بۆ هونه‌رمه‌ند حه‌سه‌ن زیره‌ك دروستبكات كه‌ شایه‌نی هونه‌ره‌كه‌ی بێت و تا نه‌وه‌ی ئێستاو داهاتوو رۆڵی ئه‌و هونه‌رمه‌نده‌ له‌ بیر نه‌كه‌ن، جێگری سه‌رۆكی حكومه‌ت به‌ڵێنیدا جێبه‌جێكردنی داواكارییه‌كه‌یدا.

PUKmedia