به‌ردانه‌وه‌ی ئاوی سیروان كاریگه‌ری له‌سه‌ر به‌نداوی ده‌ربه‌ندیخان ده‌بێت

.

چه‌ند رۆژێكه‌ ئێران ئاوی روباری سیروانی به‌رداوه‌ته‌وه‌، به‌ڕێوه‌به‌ری به‌نداوی ده‌ربه‌ندیخانیش ده‌ڵێت، ئه‌گه‌ر به‌ردانه‌وه‌ی ئاو به‌رده‌وام بێت كاریگه‌ری له‌سه‌ر عه‌مباركردنی ئاوی به‌نداوه‌كه‌ ده‌بێت.

ره‌حمان خانی به‌ڕێوه‌به‌ری به‌نداوی ده‌ربه‌ندیخان ئه‌مڕۆ 24-7-2021، به‌ PUKmedia ی راگه‌یاند، ماوه‌ی چه‌ند رۆژێكه‌ ئێران به‌رێژه‌یه‌كی زیاتر ئاوی روباری سیروانی به‌رداوه‌ته‌وه‌ و ئه‌گه‌ر به‌رده‌وامیش بێت، كاریگه‌ری له‌سه‌ر عه‌مباركردنی ئاو له‌ به‌نداوه‌كه‌ ده‌بێت و ده‌توانرێت ئاوی زیاتر بۆ ناوچه‌كانی خواروی به‌نداوه‌كه‌ به‌ربدرێته‌وه‌.

وتیشی، ئێستا رێژه‌یه‌كی كه‌م له‌ ئاوی به‌نداوه‌كه‌ به‌رزبووه‌ته‌وه‌، چونكه‌ بڕه‌كه‌ی كه‌مه‌ و له‌ مانگی ئاداری رابردوو سه‌رچاوه‌ی ئاوی روباری سیروان له‌ به‌نداوی ده‌ربه‌ندیخان بڕابوو.

به‌ڕێوه‌به‌ری به‌نداوی ده‌ربه‌ندیخان ئاماژه‌ی بۆ ئه‌وه‌شكرد، به‌ردانه‌وه‌ی ئاوی سیروان كاریگه‌ری له‌سه‌ر وێستگه‌ی ئاوی خواردنه‌وه‌ی، "ھه‌ڵه‌بجه‌ - سیروان - سه‌یدسادق"یش ده‌بێت، چونكه‌ وێستگه‌ی ئاوی خواردنه‌وه‌ی ئه‌و ناوچانه‌ له‌سه‌ر روباری سیروان دانراوه‌.

PUKmedia زانیار مه‌جید