بۆ به‌ڕ‌ێوه‌چوونی هه‌ڵبژاردنی په‌رله‌مان بۆچوونی جیاواز هه‌یه‌

.

ئه‌ندامێكی ئه‌نجومه‌نی نوێنه‌ران رایده‌گه‌یه‌نێت دوای كشانه‌وه‌ی ژماره‌یه‌ له‌لایه‌نه‌ سیاسییه‌كان، دوو بۆچوونی جیاواز له‌باره‌ی به‌رێوه‌چوونی هه‌ڵبژاردنی پێشوه‌خته‌ی په‌رله‌مانی عیراق دروست ده‌بێت، ئاماژه‌ به‌وه‌ده‌كات سه‌ركه‌وتنی گفتوگۆی ستراتیجی نێوان عیراق و ئه‌مریكا تاڕ‌اده‌یه‌ك ئه‌و دوو بۆچونه‌ جیاوازه‌ یه‌كلاده‌كاته‌وه‌.

حه‌سه‌ن ئالی ئه‌ندامی ئه‌نجومه‌نی نوێنه‌رانی عیراق به‌  PUKmedia ی راگه‌یاند: به‌هۆی بوونی چه‌ندین  به‌ربه‌ست‌ و ئاسته‌نگ له‌به‌رده‌م ئه‌نجامدانی  هه‌ڵبژاردنی داهاتووی په‌رله‌مانی عیراق، دوو بۆچون له‌باره‌ی ئه‌نجامدان‌ و نه‌دانی ئه‌و هه‌ڵبژاردنه‌ دروستكردووه‌.

وتیشی: بۆچونێك هه‌یه‌ كه‌ پێیوایه‌ هه‌ڵبژاردنی پێشوه‌خته‌ له‌كاتی خۆی ئه‌نجام نادرێت، ئه‌ویش به‌هۆی ناكۆكی نێوان پێكهاته‌كان ‌و كشانه‌وه‌ی هه‌ندێك لایه‌نی سیاسی له‌پڕ‌ۆسه‌كه‌،  كه‌ خۆیان بۆ ئه‌و هه‌ڵبژاردنه‌ تۆماركردبوو .

ئه‌و ئه‌ندامه‌ی ئه‌نجومه‌نی نوێنه‌ران ئه‌وه‌شی خسته‌روو: بۆچوونێكی دیكه‌ هه‌یه‌ ئاماژه‌ به‌وه‌ ده‌كات كه‌ ئه‌و هه‌ڵبژاردنه‌ له‌كاتی خۆی ئه‌نجامده‌درێت، به‌تایبه‌تی له‌ئه‌گه‌ری سه‌ركه‌وتنی گفتوگۆی ستراتیجی له‌گه‌ڵ ئه‌مریكا و مانه‌وه‌ی هێزه‌كانیان له‌ عیراق.

پێشیوایه‌: له‌ هه‌موو حاڵه‌ته‌كاندا ئه‌نجامدانی هه‌ڵبژاردن پێویستی به‌ زه‌مینه‌یه‌كی له‌بار هه‌یه‌ له‌ڕ‌ووی سیاسی و ئه‌منی و سه‌ربازی، تاكو بتوانرێ پارێزگاری له‌ كه‌شوهه‌وای هه‌ڵبژاردنه‌كه‌ و سندوقه‌كانی ده‌نگدان بكات، هاوكات زۆربه‌ی نێوه‌نده‌ جیهانیه‌كانیش له‌گه‌ڵ ئه‌نجامدانی ئه‌و هه‌ڵبژاردنه‌ن.

بڕ‌یاره‌ له‌ 10ی 10ی 2021 ی ئه‌مساڵ هه‌ڵبژاردنی پێشوه‌خته‌ی په‌رله‌مانی عیراق به‌ڕ‌ێوه‌بچێت، بۆ ئه‌مه‌ش له‌لایه‌ن كۆمسیۆنی هه‌ڵبژاردنه‌كان ئاماده‌كارییه‌كان ده‌ستی پێكردووه‌ و ئێستا له‌ قۆناغی بانگه‌شه‌ی كاندیده‌كان دایه‌.

PUKmedia  ته‌ها عه‌بدولڵا، هه‌ولێر