وه‌زاره‌تی كشتوكاڵ چه‌ند مه‌رجێك بۆ قوربانیكردنی ئاژه‌ڵ داده‌نێت

.

وه‌زاره‌تی كشتوكاڵی هه‌رێمی كوردستان له‌ڕاگه‌یه‌نراوێكدا كه‌ وێنه‌یه‌كی ده‌ستPUKmedia که‌وتووه‌، چه‌ند ڕێنماییه‌كی بۆ به‌رچاوڕوونی ئه‌و كه‌سانه‌ی كه‌ ده‌یانه‌وێت قوربانی بكه‌ن به‌بۆنه‌ی جه‌ژنی قوربانی ده‌ركردووه‌ و ڕایگه‌یاندووه‌ ده‌بێت ئه‌و ئاژه‌ڵه‌ی كه‌ سه‌رده‌بڕێت ده‌بێت ته‌ندروست بێت و ئاژه‌ڵه‌كه‌ له‌ كوشتارگا سه‌رببڕێ، بۆ ئه‌وه‌ی پشكنینی بۆ بكرێت.

 ئه‌مه‌ش ده‌قی ڕاگه‌یه‌نراوه‌كه‌:

چه‌ند رێنماییه‌كی گرنگ بۆ به‌رچاو روونی ئه‌و هاووڵاتیانه‌ی خوازیاری قوربانی كردنن به‌بۆنه‌ی جه‌ژنه‌وه‌، به‌تایبه‌تی دوابه‌دوای بڵاوبونه‌وه‌ی نه‌خۆشی تای خوێن به‌ربوون(الحمی النزفیه‌) له‌ عێراق.

به‌ڕێزان .....له‌به‌ر هه‌بوونی نه‌خۆشی تای خوێن به‌ربوون له‌عێراق ،هه‌رچه‌نده‌ تا ئێستا له‌ كوردستان ئه‌م حاڵه‌ته‌ به‌دی نه‌كراوه‌ ،له‌پێناو كۆنترۆڵكردنی نه‌خۆشیه‌كه‌ و سه‌لامه‌تی ئێوه‌ به‌هۆی ئه‌وه‌ی كه‌ ئه‌م جۆره‌ نه‌خۆشیه‌كه‌ ڕاسته‌وخۆ ده‌گوازرێته‌وه‌ بۆ مرۆڤ،وه‌زاره‌تی كشتوكاڵ و سه‌رچاوه‌كانی ئاو /ب.گ. سامانی ئاژه‌ڵ و فێترنه‌ری به‌پێویستی ده‌زانێت كه‌ ئه‌م رێنماییانه‌ی خواره‌وه‌ بۆ به‌رچاو روونی زیاتری به‌ڕێزتان بلاو بكاته‌وه‌ :

یه‌كه‌م/ئه‌و ئاژه‌ڵه‌ی سه‌رده‌بڕدرێت ده‌بێت ته‌ندروست بێت و قڕنه‌وگه‌نه‌ی له‌سه‌ر نه‌بێت.

دووه‌م/ئاژه‌ڵی قوربانی له‌ كوشتارگه‌ سه‌رده‌بڕدرێت ،تاكو پشكنینی پێش سه‌ربڕین و دوای سه‌ربڕینی بۆ بكرێت و دڵنیابین له‌ ته‌ندروستی گۆشته‌كه‌.

سێیه‌م/گۆشتی قوربانی له‌ ناو كیسی شه‌فاف دابه‌ش بكرێت و ده‌بێت كیسه‌كه‌ خاوێن و نوێ بێت .

چواره‌م/سه‌ربڕینی ئاژه‌ڵ له‌ ناو ماڵ و كۆڵان هۆكارێكه‌ بۆ بڵاوبونه‌وه‌ی نه‌خۆشیه‌كان و پیس بوونی ژینگه‌ ،هه‌روه‌ك  دیارده‌یه‌كی ناشارستانیه‌، به‌تایبه‌تی له‌ ئێستادا كه‌ چه‌ند حاڵه‌تێكی نه‌خۆشی خوێن به‌ربوون (الحمی النزفیه‌)له‌ عێراقدا تۆمار كراوه‌.

پێنجه‌م/له‌كاتی وه‌رگرتنی گۆشتی قوربانی ڕاسته‌وخۆ به‌كاری مه‌هێنه و بیست چوار كاتژمێر له‌ ساردكه‌ره‌وه‌ی بهێڵه‌وه‌.

شه‌شه‌م/له‌كاتی ده‌ستكاری كردنی گۆشت و لاشه‌ی ئاژه‌ڵ ده‌ستكێش به‌كار بهێنه‌.

حه‌وته‌م/ئه‌گه‌ر گومانت له‌ گۆشتی ئاژه‌ڵی قوربانی هه‌بوو په‌یوه‌ندی به‌ لێژنه‌كانه‌وه‌ بكه‌.

له‌پێناو سه‌لامه‌تی و ته‌ندروستی ئێوه‌ هیوادارین كه‌ سه‌رباری رێنماییه‌ ئاینیه‌كان ئه‌م رێنمایانه‌ش جێبه‌جێ بكه‌ن ،خێری هه‌موولایه‌ك قبول بێت، ٳن شاءالله‌.

     راگه‌یاندنی وه‌زاره‌تی
 كشتوكاڵ و سه‌رچاوه‌كانی ئاو

PUKmedia