سێ ناحیه‌ی سنوری كه‌ركوك به‌شێوه‌یه‌كی ره‌سمی ناسێنران

هه‌رسێ ناحیه‌كه‌ ناوه‌كانی پێشوویان بۆ گه‌ڕێنرایه‌وه‌

له‌لایه‌ن وه‌زاره‌تی ناوخۆی عیراق و به‌زۆرینه‌ی ده‌نگی ئه‌ندامانی ئه‌نجومه‌نی پارێزگای كه‌ركوك به‌شێوه‌یه‌كی ره‌سمی  به‌ڕێوه‌به‌ری ناحیه‌ بۆ هه‌ریه‌ك له‌ناحیه‌كانی (قه‌ره‌هه‌نجیر و شوان و قه‌ره‌حه‌سه‌ن) دیاری كران، كه‌پێشتر ناوه‌كانیان له‌لایه‌ن (مجلس قیاده‌ ئه‌لسه‌وره‌)  سڕدرابۆوه‌.

ئه‌ڵماس فازل ئه‌ندامی ئه‌نجومه‌نی پارێزگای  كه‌ركوك به‌ PUKemdia ی راگه‌یاند: به‌ دوو له‌سه‌ر سێی ده‌نگی ئه‌ندامانی ئه‌نجومه‌نی پارێزگای كه‌ركوك به‌ڕێوه‌به‌ری ناحیه‌ بۆ هه‌ریه‌ك له‌ناحیه‌كانی (قه‌ره‌هه‌نجیر و شوان و قه‌ره‌حه‌سه‌ن ) دیاری كران.

وتیشی: دیاری كردنی به‌ڕێوه‌به‌ری ناحیه‌ بۆ ئه‌و ناحیه‌یه‌ له‌دوای ئه‌وه‌ دێت كه‌ وه‌زاره‌تی ناوخۆی عیراق و شاره‌وانیه‌كان هه‌موو بڕیاره‌كانی سه‌رده‌می رژێمی به‌عسیان هه‌ڵوه‌شانده‌وه‌و ناوه‌كانی پێشوشیان گه‌ڕانده‌وه‌ بۆ ئه‌و سێ ناحیه‌یه‌.

ناوبراو رونیشكرده‌وه‌ له‌ئێستادا به‌شێوه‌یه‌كی ره‌سمی ئه‌و سێ ناحیه‌یه‌ گه‌ڕێنراونه‌ته‌وه‌ سه‌ر پارێزگای كه‌ركوك و وه‌زاره‌تی ناوخۆی عیراقیش به‌شێوه‌یه‌كی ره‌سمی مامه‌ڵه‌یان له‌گه‌ڵدا ده‌كات .

ئه‌و ئه‌ندامه‌ی ئه‌نجومه‌نی پارێزگای كه‌ركوك ئه‌وه‌شی خسته‌ روو: له‌دوای پرۆسه‌ی رزگاری عیراقه‌وه‌ حكومه‌تی هه‌رێم توانی ئیداره‌یه‌كی باش له‌و جێگایانه‌ دروست بكات و ئه‌نجومه‌نی پارێزگای كه‌ركوكیش هه‌موو هاوكاریه‌كی ئه‌و ئیدارانه‌ی كردوه‌ به‌هاوكاری حكومه‌تی هه‌رێم ساڵانه‌ بودجه‌ی بۆ ئه‌و سێ ناحیه‌یه‌ ته‌رخانكردوه‌ .

ئه‌و ئه‌ندامه‌ی ئه‌نجومه‌نی پارێزگای كه‌ركوك ئاشكراشیكرد له‌ئێستابه‌دواوه‌ حكومه‌تی ناوه‌ند به‌شێوه‌یه‌كی ره‌سمی مامه‌ڵه‌ له‌گه‌ڵ ئه‌و سێ ناحیه‌كه‌دا ده‌كات كه‌پێشتر به‌ بڕیاری مجلس قیاده‌ ئه‌لسه‌وره‌ ناوه‌كانیان سڕابوه‌وه‌.

PUKmedia هه‌ردی ئه‌بوبه‌كر