پەرلەمان بەربەستە یاساییەكان بۆ هەڵبژاردنی ئەنجومەنی پارێزگاكان لادەبات

هەڵبژاردنی پەرلەمان بەلیستی نیمچەكراوەو بەیەك بازنە بەڕێوەدەچێت

لە دانیشتنی ئەمڕۆی پەرلەمانی كوردستان   دوو یاسای تایبەت بە هەڵبژاردنەكانی پەرلەمان‌و ئەنجومەنی پارێزگاكانی هەرێم  هەمواركرایەوە.

بەگوێرەی یاسایی یەكەم  سستەمی هەڵبژاردنی پەرلەمانی كوردستان  لە لیستی  داخراو بۆ لیستی  نیمچەكراوە گۆڕاو، هاوكات  بڕگەی 5 ی یاسای 32 ی ئەنجومەنی پارێزگاكان لابرا، بەمەش  هەڵبژاردنی ئەنجومەنی پارێزگاكان لە وادەی دیار كراوی خۆی لە 2013/9/21، بەڕێوەدەچێت.

د.ئەحمەد وەرتی ئەندامی لیژنەی یاسایی پەرلەمانی كوردستان بە PUKmedia ی راگەیاند: لە دانیشتنی ئەمڕۆی پەرلەمانی كوردستان، جگە لە  دەنگدان لەسەر درێژەكردنەوەی ماوەی كارپێنەكردنی یاسای بەكرێدانی خانوبەرە، دوو  یاسای تایبەت بە هەڵبژاردنەكانی هەرێم  هەمواركرایەوەو بەكۆی دەنگ پەسندكران.

وتیشی: یاسای یەكەم تایبەتە بە هەڵبژاردنی پەرلەمانی كوردستان، بەگوێرەی ئەو یاسایە هەڵبژاردنی پەرلەمان لە لیستی داخراوەوە دەبێتە لیستی نیمچە كراوە، هاوكات هەرێمی كوردستان بۆ ئەو هەڵبژاردن بەیەك بازنەی  هەڵبژاردن بەڕێوەچێت، دوای ئەوەی پێشنیاری سێ بازنە رەتكرایەوە.

راشیگەیاند: هەر لە كۆبونەوەكەدا بەكۆی دەنگ  دوو بڕگەی لە یاسای هەڵبژاردنی ئەنجومەنی پارێزگاكان هەمواركردووە، بەگوێرەی بڕگەی یەكەمی ئەو هەمواركردنەوەیە، بڕگەی 5 لە مادەی 32 ی یاساكە لابرا كە باس لە دەنگدانی  پێكهاتەكان بە لیستەكانی خۆیان دەكات، بەمەش داواكارییەكەی كۆمسیۆن جێبەجێكراو دەتواندرێت هەڵبژاردنی ئەنجومەنی پارێزگاكان لە وادەی خۆی بەڕێوەبچێت.

روونیشیكردەوە: بڕگەیەكی تری هەمواركردنەوەی  یاسای  هەڵبژاردنی ئەنجومەنی پارێزگاكان باس لەوەدەكات هێزەكانی ناوخۆ  سەرپەرشتی پاراستنی ناوەندەكانی هەڵبژاردن دەكەن،  جگە لەوانە  هیچ هیزێكی ئاسایشی ناوخۆ یان چەكدار  بۆیەی نییە بچێتە ناو ناوندەكانی هەڵبژاردنەوە، تەنها بەرەزامەندی سەرۆكی لیژنەی هەڵبژاردن نەبێت.

لەلایەكی ترەوە، سالم تۆما سەرۆكی لیستی رافیدێن، بە PUKmedia ی راگەیاند: ئێمە وەك پێكهاتەی مەسیحی لە پەرلەمانی كوردستان نامەنەوێت ببینە رێگر لەبەردەم بەڕێوەنەچوونی هەڵبژاردنی ئەنجومەنی پارێزگاكان، بەهۆی نەبوونی تۆماری دەنگدەرانمان، بۆیە لەسەر لابردنی بڕگەی 5 ی  یاسای هەڵبژاردنی ئەنجومەنی پارێزگاكان رازی بووین.

وتیشی: لەگەڵ ئەوانەش ئێمە داوا لە حكومەتی هەرێم دەكەین بۆ خولی داهاتوو تۆماری دەنگدەران بۆ پێكهاتەكانی تری كوردستان ئامادە بكات، تاكو ئێمەش بتوانین رێژەی دەنگدەرانمی خۆمان دەستنیشان بكەین.

جێی ئاماژەیە، پێشتر كۆمسیۆنی باڵای سەربەخۆی هەڵبژاردنەكان داوای لە حكومەت‌و پەرلەمان كردبوو ئەگەر بڕگەی 5 لە یاسای هەڵبژاردنی ئەنجمەنی پارێزگاكان لانەبەن یان هەموارنەكرێتەوە، ئەوان ناتوانن  ئەو هەڵبژاردنە ئەنجامبدەن، چونكە بەگوێرەی بڕگەكەیە، پێویستە پێكهاتەكان دەنگ بە  لیستی پێكهاتەكانی خۆیان بدەن، لەكاتێكدا ئەو پێكهاتانە هیچ تۆمارێكی دەنگدەرانی تایبەتیان نەبوو، تابتواندرێت لە دەنگدەرانی تری جیا بكەنەوە.

PUKmedia تەها عەبدوڵڵا - هەولێر