ژمارەی حاجیانی هەرێم كەمدەكرێتەوە

وێنەی ئەرشیف

ئەمساڵ ژمارەی ئەو حاجیانەی لە هەرێمی كوردستان ناویان بۆ بەجێهێنانی فەریزەی حەج تۆماركردووە، كەمدەكرێنەوە، وتەبێژی وەزارەتی ئەو قاف و كاروباری ئایینی هۆكارەكەی بۆ نوێكردنەوەو فراونكردنی مەككەی پیرۆز دەگەڕێنێتەوە.

مەریوان نەقشبەندی وتەبێژی وەزارەتی ئەوقاف و كاروباری ئایینی بە PUKmedia ی راگەیاند: میرنشینی سعودیە رایگەیاندووە كە ئەمساڵ بەهۆی فراونكردن و نوێكردنەوەی (مەككە) ی پیرۆز، یەك ملیۆن حاجی لە سەرتاسەری جیهان كەمدەكاتەوە، كە 25% ی حاجیانی جیهان دەكات.

وتیشی: میرنشینی سعودیە بە نوسراوی رەسمی داوای لە تەواوی وڵاتانی ئیسلامی كردووە كە رێژەی ناردنی حاجییەكانیان 20% كەم بكەنەوە، ئەو نوسراوە ئاڕاستەی عیراق و هەرێمی كوردستان- یش كراوە.

نەقسبەندی ئاشكراشیكرد كە بەپێی ئەو بڕیارە 6000 حاجی لە عیراق كە دەبێتەوە، لەو ژمارەیەش 930 حاجی بەر هەرێمی كوردستان دەكەوێت، ئەو حاجییانەی لە ئەمساڵدا سەفەری (مەككە) ناكەن لەساڵی ئایندەدا سەفەرەكەیان بۆ رێكدەخرێت.

راشیگەیاند: تەنها كێشەیەك كە هەبێت ئەوەیە، پێش دەرچوونی بڕیارەكە سەرجەم وڵاتانی ئیسلامی بۆندی فڕۆكەیان ئیمزاكردووە بۆ گواستنەوەی حاجییەكانیان و ئۆتێل و چێشتخانەی تایبەت بەخۆیان لە( مەككە)ی پیرۆز گرتووە.
لەمساڵدا بەشی هەرێمی كوردستان بۆ سەفەری حەج 4650 حاجی بوە.

PUKmedia هەردی ئەبوبەكر