پارتی وەڵامی گۆڕان دەداتەوە

پارتی وەڵامی گۆڕان دەداتەوە

وتەبێژی پارتی دیموكراتی كوردستان تۆمەتەكانی رێكخەری بزووتنەوەی رەتدەكاتەوەو رایدەگەیەنێت كە ناوبراو هەموو هەوڵێكی بۆ پەكخستنی دەستوور و گەوجاندنی جەماوەری بێئەنجام بووە، ئێستاش لە هەوڵی ئەوە دایە لەڕێی گرژتركردنی كەشوهەوای سیاسی، خەڵكی كوردستان بەگژیەكدا بكاتەوە و تا هیچ بوارێك بۆ سازدانی هەڵبژاردن نەمێنێت.

لە روونكردنەوەیەكدا وتەبێژی مەكتەبی سیاسیی پارتی دیموكراتی كوردستان كە لە پێگەی رەسمیی پارتەكە بڵاوكراوەتەوە، رایدەگەیەنێت كە پارتی دیموكراتی كوردستان و یەكێتیی نیشتمانیی كوردستان و لایەنە سیاسییەكانی كوردستان و رێكخراوەكانی كۆمەڵگەی مەدەنی و پسپۆڕان و رۆشنبیرانی گەلەكەمان، هەموو تواناكانی خۆیان لەپێناوی سەرخستنی كۆدەنگی و پڕۆسەی سیاسی و یەكڕیزی تەرخانكردووە، كەچی رێكخەری گۆڕان هەموو تواناكانی بۆ تێكدان و پاشاگەردانی و شڵەژانی سیاسی تەرخانكردووە، ناهەقی زۆریشی بەرامبەر جەنابی مام جەلال كرد كە نەدەبوایە رێگە بەخۆی بدات لەوكاتەی كە جەنابیان لە نەخۆشخانەیە بەمشێوەیە بوختانی بۆ هەڵبەستێت.

لە بەشێكی تری روونكردنەوەكەدا هاتووە: لەو كاتەی كە خەڵكی كوردستان چاوەڕێی سەركەوتنی ئەو پڕۆسەیەن كە لەلایەن پەرلەمانی كوردستان و لایەنە سیاسییەكان بۆ گەیشتن بە كۆدەنگی سیاسی لەسەر دەستوور و پتەوتربوونی كۆڵەكەكانی یاساپارێزی و حوكمی گەل لە وڵاتدا دەستیپێكردووە، لە هەنگاوێكی پێچەوانە و لەڕۆژی 17 ی ئەم مانگەدا رێكخەری گۆڕان كۆمەڵێك وتەی ناڕاست و پڕ لە بوختانی بۆ ژمارەیەك لە هەوادارانی خۆی باسكردووە، كە نەك تەنیا هیچ سوودێكی بۆ پڕۆسەی سیاسی هەرێم نییە، بەڵكو بە ئاشكرا لە هەوڵی ئەوەدایە زبری و دوژمنكاری بهێنێتەوە نێو كەشوهەوای سیاسی و هیچ جۆرە متمانەیەك لەنێو كۆمەڵانی خەڵكی كوردستاندا نەهێڵێت.
پێویستە خەڵكی كوردستان ئەوە بزانن كە رێكخەری گۆڕان هەروەك چۆن دژی دەنگدانی راستەوخۆی خەڵكی كوردستانە، دژی ئەوەش بووە كە حزب و لایەنەكان بەشداری گفتوگۆكردن بن لەسەر نامەكەی سەرۆك بارزانی بۆ پەرلەمان و تەنانەت نەشیویستووە پڕۆژەكانیان لەبارەی پڕۆژەی دەستوورەوە وەربگیرێت.

هەموو هەوڵێكی بۆ پەكخستنی دەستوور و گەوجاندنی جەماوەری بێئەنجام بووە، بۆیە لە هەوڵی ئەوەدایە لەڕێی گرژتركردنی كەشوهەوای سیاسی، خەڵكی كوردستان وا بەگژیەكدا بكاتەوە كە هیچ بوارێكیش بۆ سازدانی هەڵبژاردن نەمێنێت.
لە كۆتایی روونكردنەوەكەدا هاتووە: جەماوەری گەلەكەمان ئاگادار دەكەینەوە كە پارتی دیموكراتی كوردستان و حزبە خەباتگێڕەكانی دیكە خۆیان بە پارێزەری گەل و نیشتیمان دەزانن و ڕێگە نادەن پیلانگێڕی سەر بكەوێت.

لە  kdp.knfo ـەوە وەرگیراوەە

PUKmedia