سالار مەحمود: ماف بۆ مامۆستایانی ئایینی خۆبەخش دەگەڕێنینەوە

PUKMEDIA

سالار مەحمود

ئەندامێکی سەرکردایەتی یەکێتی لەپەیامێکیدا پیرۆزبایی ساڵیادی دامەزراندنی یەکێتیی زانایانیی ئاینی ئیسلام دەکات و رایدەگەیەنێت: "یەکێتی بڕوای تەواوی بە پرەنسیپە بەرزەکانی ئایینی پیرۆزی ئیسلام و پێکەوە ژیان هەیە و ماف بۆ سەرجەم مامۆستایانی ئایینی خۆبەخش دەگەڕێنینەوە".

سالار مەحمود ‎ئەندامی سەرکردایەتی یەکێتیی نیشتمانیی کوردستان و لێپرسراوی مەڵبەندی گەرمیان لەپەیامێکیدا کە بۆ وێبسایتی رەسمی یەکێتیی نیشتمانیی کوردستان PUKMEDIA ی ناردووە رایدەگەیەنێت: "دامەزراندنی یەکێتی زانایانی ئایینی ئیسلامی کوردستان رۆژێکی گرنگە، بەبۆنەی ئەم یادە پیرۆزەوە گەرمترین پیرۆزبایی لە سەرجەم ئەندامانی یەکێتیەکە و هەموو مامۆستایانی ئایینی و موسوڵمانی کوردستان دەکەم".

‎"مامۆستایانی ئایینی ڕۆڵی گەورەیان هەبوە لە ئاشتەوایی گشتی و  پێکەوە ژیانی ئاشتیانەی ئایین و ئایینزاکان لەکوردستان. یەکێتی زانایانی ئایینی لەناو کوردەواریدا ئەم کەلتورەیان گەیاندە لوتکە و لەخزمەت هۆشیارکردنەوەی تاک و پێشخستنی کۆمەڵگەو دژایەتی توندڕەویی بەردەوامن لە خزمەت و چاکەی گشتی، زانایانی ئاینی لە شۆڕشی گەلەکەمان دژی داگیرکاریی و ستەم و داکۆکی لە ناسنامەی نیشتمانی و نەتەوەییمان دەوری باڵایان بینیوە، هەروەها لەبڵاوکردنەوەی دەقە زانستیەکانی شەریعەت و عەقیدەی بەرزی ئیسلامی پێشەنگن"، سالار مەحمود وادەڵێت.

‎ئەوەش دەڵێت: "یەکێتیی نیشتمانیی کوردستان بڕوای تەواوی بە پرەنسیپە بەرزەکانی ئایینی پیرۆزی ئیسلام و پێکەوە ژیان هەیە، جەخت لەوەدەکەینەوە سەرجەم ئایینەکان بەگشتی و ئایینی پیرۆزی ئیسلام بەتایبەتی و بنەماکانی ڕەوشت و ئاکاری بەرزی پێغەمبەر (د.خ) هەر پایەدارن، لەم بۆنەدا جەخت لە ڕاستکردنەوەی ڕێڕەوی حوکمڕانی دەکەینەوە لە کوردستاندا دوای هەڵبژاردن و پێکهێنانی کابینەی نوێ ماف بۆ سەرجەم مامۆستایانی ئایینی خۆبەخش بگێڕینەوە".

PUKMEDIA