یه‌كێتی به‌كاندیدی گه‌نج و خاوه‌ن بڕوانامه‌وه‌ ده‌چێته‌ هه‌ڵبژاردنه‌وه‌

PUKMEDIA

لۆگۆی یەکێتی

یه‌كێتیی نیشتمانیی كوردستان به‌ 172 كاندیده‌وه‌ له‌هه‌ر چوار بازنه‌كه‌ی هه‌ڵبژاردنی خولی شه‌شه‌می په‌رله‌مانی كوردستان به‌شداری ده‌كات، كه‌ به‌شێكی زۆری كاندیده‌كانی گه‌نجن و له‌بڕوانامه‌دا له‌ئاستێكی باڵادان كه‌ 88% یان خاوه‌نی بڕوانامه‌ی به‌رزن و دابه‌شبوون به‌سه‌ر پسپۆڕێتییه‌كاندا كه‌ په‌رله‌مانی كوردستان ده‌یخوازێت.

كاندیده‌كانی یه‌كێتی خاوه‌ن بڕوانامه‌ن

به‌گوێره‌ی زانیارییه‌كانی وێبسایتی ره‌سمی یه‌كێتیی نیشتمانیی كوردستان PUKMEDIA  كه‌ له‌مه‌كته‌بی هه‌ڵبژاردنه‌وه‌ ده‌ستیكه‌وتووه‌، 22.67% ی كاندیده‌كانی بڕوانامه‌ی خوێندنی باڵایان هه‌یه‌ كه‌ 39 كاندیده‌، هه‌روه‌ها 65.7%ی كاندیده‌كان بڕوانامه‌ی به‌كارلیۆس و دیبلۆمیان هه‌یه‌ كه‌ 113 كاندیده‌، هاوكات كه‌مترین كاندیدی بڕوانامه‌ی ئاماده‌یی و خوارتریان هه‌یه‌ كه‌ رێژه‌كه‌ی ده‌گاته‌ 11.62% ، كه‌ 20 كاندیده‌.

بڕیاره‌ به‌پێی پێنجه‌مین مه‌رسومی سه‌رۆكی هه‌رێمی كوردستان رۆژی 20-10-2024 هه‌ڵبژاردنی خولی شه‌شه‌می په‌رله‌مانی كوردستان بكرێت كه‌ كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ڕێوه‌یده‌بات و سیستمی هه‌ڵبژاردنه‌كه‌ش فره‌ بازنه‌ییه‌.
 

به‌شێكی زۆر كاندیده‌كانی یه‌كێتی گه‌نجن

به‌پێی به‌دواداچوونی PUKMEDIA ، كه‌ پشت به‌و زانیارییه‌ به‌رده‌ستانه‌ی ده‌به‌ستێت كه‌ له‌مه‌كته‌بی هه‌ڵبژاردنی یه‌كێتییه‌وه‌ له‌سه‌ر كاندیده‌كان ده‌ستیكه‌وتووه‌، رێژه‌ی ته‌مه‌نی كاندیده‌كانی یه‌كێتی به‌شێكی به‌رچاو گه‌نجن كه‌ 23 كاندیده‌و رێژه‌كه‌ی ده‌گاته‌ 13.37% كه‌ته‌مه‌نیان له‌نێوان 25 بۆ 40 ساڵدایه‌، هه‌روه‌ها 120 كاندید ته‌مه‌نیان له‌نێوان 40 بۆ 60 ساڵدایه‌ كه‌ رێژه‌كه‌ی ده‌گاته‌ 69.77% ، له‌گه‌ڵ ئه‌وه‌شدا 29 كاندیدی یه‌كێتی ته‌مه‌نیان له‌نێوان 50 بۆ 60 ساڵدایه‌ كه‌ رێژه‌كه‌ی زۆر كه‌مه‌و ده‌گاته‌ 16.86%.

زیاتر له‌رێژه‌ی یاسایی ژنان كاندیدی یه‌كێتین

به‌گوێره‌ی زانیارییه‌كانی PUKMEDIA ، رێژه‌ی به‌شداری ژنان به‌ته‌واوی له‌به‌رچاوگیراوه‌و له‌كۆی 172 كاندید، 62 كاندیدیان ژنن و رێژه‌كه‌ی ده‌گاته‌ زیاتر  36%.

یه‌كێتی به‌ 172 كاندید به‌شداری ده‌كات

 یه‌كێتیی نیشتمانیی كوردستان له‌هه‌ولێر 64 كاندیدو له‌سلێمانی 72 كاندید و له‌هه‌ڵه‌بجه‌ 6 كاندیدو له‌دهۆك 30 كاندیدی بۆ خولی شه‌شه‌می په‌رله‌مانی كوردستان هه‌یه‌ كه‌ به‌كۆی گشتی 172 كاندیدی هه‌یه‌.

PUKMEDIA