شەش مانگە حکومەت وەڵامی داوایەکی کەسوکاری شەهیدان و ئەنفالکراوان ناداتەوە

PUKMEDIA

کۆنگرەی رۆژنامەوانی کەسوکاری شەهیدان و ئەنفالکراوان و زیندانیانی سیاسی

نزیکەی 6 مانگە حکومەتی هەرێمی کوردستان وەڵامی نووسراوێک ناداتەوە بۆ خەرجکردنی مینحەی کەسوکاری شەهیدان و ئەنفالکراوان و زیندانیانی سیاسی، لە کۆنگرەیەکیشدا کەسوکارەکانیان رایانگەیاند: "تا داواکاریەکەمان جێبەجێ نەکرێت هەولێر جێناهێڵین".

"هەولێر جێناهێڵین"

کەسوکاری شەهیدان و ئەنفالکراوان و زیندانیانی سیاسی، ئەمڕۆ سێشەممە 10ـی 9می 2024، لە هەولێر کۆنگرەیەکی رۆژنامەوانییان ئەنجامدا و رایانگەیاند: "داوای خەرجکردنی مینحەکانمان دەکەین و نزیکەی هەشت جارە دێینە هەولێر، بەڵام مینحەکانمان بۆ نەبەستراوە".

ئاماژەیان بەوەشدا: "رۆژی 22ـی 3ـی 2024 وەزارەتی شەهیدان و ئەنفالکراوان نووسراوی بۆ وەزارەتی دارایی و لەوێشەوە بۆ ئەنجومەنی وەزیران کردووە بەمەبەستی بەستنی مینحەی زیاتر لە 25 هەزار کەسوکاری شەهید و ئەنفال و زیندانی سیاسی"، "بەڵام دواتر ئەنجومەنی وەزیران رۆژی 22ـی 8ـی 2024 نووسراوەکەی بە بیانووی نەبوونی پارە جێبەجێ نەکردووە گەڕاندوویەتیەوە بۆ وەزارەتی دارایی".

"نزیکەی هەشت جارە دێینە هەولێر بە مەبەستی جێبەجێکردنی داواکاریەکانمان و خەرجکردنی مینحەکانمان، تا داواکاریەکەشمان جێبەجێ نەکرێت هەولێر جێناهێڵین"، کەسوکاری شەهیدان و ئەنفالکراوان و زیندانیانی سیاسی وایان وت.

لە عیراق 25 ساڵە و لە هەرێم 10 ساڵ

کەسوکاری شەهیدان و زیندانیانی سیاسی لە عیراق بەپێی یاسا بۆ ماوەی 25 ساڵ مینحە وەردەگرن، بەڵام لە هەرێم ماوەی 10 ساڵ مینحە وەردەگرن.

عەبدوڵڵا حاجی مەحمود وەزیری کاروباری شەهیدان و ئەنفالکراوان رایگەیاند: "پڕۆژەیەکمان ئامادەکردووە بۆئەوەی لەگەڵ حکومەتی عیراق مینحەی کەسوکاری شەهیدان و ئەنفالکراوان و زیندانیانی سیاسی خەرج بکرێت و بێبەش نەبن لە مافەکانیان".

"لە رابردوودا 5 هەزار و 212 کەس لە کەسوکاری شەهیدان و ئەنفالکراوان و زیندانیانی سیاسی مینحەیان وەرگرت، بەڵام یاساکەی عیراق بۆ 25 ساڵە لەگەڵ ئێمە جیاوازە، دەمانەوێت سەرجەمیان هەقی خۆیان وەربگرن".

کەسوکاری شەهیدان و ئەنفالکراوان و زیندانیانی سیاسی ژمارەیان زیاتر لە 25 هەزار کەسە و مینحەکانیان بۆنەبەستراوە، لەکاتێکدا لە عیراق بۆ ماوەی 25 ساڵ مینحە وەردەگرن، بەڵام لە هەرێم 10 ساڵ مینحە وەردەگرن.
PUKMEDIA