قوباد تاڵەبانی: هێزە ئەمنییەكانمان بوێرانە ئارامی كوردستان دەپارێزن

PUKMEDIA

قوباد تاڵەبانی، فاروقی مەلامستەفا، د. هەڤاڵ ئەبوبەكر

قوباد تاڵەبانی جێگری سەرۆكی حكومەتی هەرێم رایدەگەیەنێت: "هێزە ئەمنییەكانمان دڵسۆزانەو بوێرانە بەردەوامن لەپاراستنی ئارامی كوردستان"، لەبارەی مووچەشەوە دەڵێت: "چاودێری دارایی عیراق سەرقاڵی وردبینیكردنی مووچەی مووچەخۆرانی هەرێمەو لەگەڵ تەواوبوونی پڕۆسەكەدا مووچە رەوانەی هەرێم دەكرێت".

قوباد تاڵەبانی جێگری سەرۆكی حكومەتی هەرێم لەمەراسیمی كردنەوەی ئەندەرپاسی فاروقی مەلامستەفا، بۆ كەناڵەكانی راگەیاندن لەبارەی كەركوكەوە ئاماژەی بەوەدا: "پێویستە كەركوك و سەرجەم پێكهاتەكانی بەبێ جیاوازی خزمەتبكرێن و ئیدارەیەكی یەكسان و هەمەپێكهاتە بۆ خزمەتی كەركوكییەكان پێكبێنین، تاوەكو رێگری بكرێت لەوەی چیتر زوڵم لە كورد و توركمانەكانی كەركوك نەكرێت".

لەبارەی ئارامی شاری سلێمانیشەوە رایگەیاند: "د. هەڤاڵ ئەبوبەكر باشترین كەسە تاوەكو بتوانێت باس لە ئارامی شارەكە بكات، چۆن هەركات پێویست بووبێ رەخنەی گرتووە و دڵسۆزانە باسی لە دۆخی ئەمنی شارەكە كردووە".

قوباد تاڵەبانی لەبارەی رووداوە تیرۆرستییەكەی قەرەداغیشەوە وتی: "بەپێی راگەیەندراوی دەزگای ئاسایش رووداوەكە تیرۆرستی بووە، هێزە ئەمنییەكانمان دڵسۆزانەو بوێرانە بەردەوامن لەپاراستنی ئارامی كوردستان، هەماهەنگی كۆمەڵانی خەڵكی كوردستان و  هێزە ئەمنییەكانیش وایكردووە باشتر بتوانرێت ئارامی كوردستان بپارێزین".

جێگری سەرۆكی حكومەتی هەرێم ئەوەشی راگەیاند: "لەئێستادا چاودێری دارایی عیراق سەرقاڵی وردبینیكردنی مووچەی مووچەخۆرانی هەرێمەو تا ئێستا پڕۆسەكە تەواو نەبووە، لەگەڵ تەواوكردنی پڕۆسەكەش مووچەی وردبینیكراو دەنێرن بۆ وەزارەتی دارایی و دواتر مووچەی مووچەخۆران رەوانەی هەرێم دەكرێت".
 
PUKMEDIA