شنیار ئەنوەر یەکێتی هەڵدەبژێرێت

PUKMEDIA

شنیار ئەنوەر کاندیدی یەکێتی بۆ هەڵبژاردنی پەرلەمانی کوردستان

شنیار ئەنوەر بۆ هەڵبژاردنی خولی شەشەمی پەرلەمانی کوردستان کاندیدی یەکێتیی نیشتمانیی کوردستانە و راشیدەگەیەنێت: "هیچ هێزێک ناتوانێت ببێتە بەدیلی یەکێتی و بڕیارمداوە لەگەڵ یەکێتی کار بۆ گۆڕانکاری بکەم، چونکە ئەم حزبە بڵندگۆیەکە بۆ هەر دەنگ و ڕەنگێک کە خەونی نیشتمانێکی خۆشگوزەران و ئازادی هەبێت".

"لەگەڵ یەکێتی کار بۆ گۆڕانکاری دەکەم"

شنیار ئەنوەر کاندیدی یەکێتیی نیشتمانیی کوردستان بۆ خولی شەشەمی پەرلەمانی کوردستان لە پەیامێکی ڤیدیۆییدا ئاماژەبەوەدەکات: "یەکێتی تەنها ماڵی کادر و ئەندامانی ئەو حزبە نییە، بەڵکو بڵندگۆیەکە بۆ هەر دەنگ و ڕەنگێک کە خەونی نیشتمانێکی خۆشگوزەران و ئازادی هەبێت، کە هەمووان بە ویستی خۆیان تێیدا بژین و بیربکەنەوە و داهێنان بکەن".

"بڕیارمداوە لەگەڵ یەکێتی کار بۆ گۆڕانکاری بکەم، لە ماوەکانی رابردوودا ئۆپۆزسیۆن بوو بە وسیتی کەسی و بەهێزکردنی دەسەڵاتی لایەنێک و خەونی هەزاران کەس دزراو کرا بە پەیژەیەک بۆ چەند کەسێک، ئەوەش سەلمێندرا کە هیچ هێزێک ناتوانێت ببێتە بەدیلی یەکێتی، چونکە بێ یەکێتی تاکڕەوی پەرەدەسێنێت و مووچەخۆران، فەرمانبەران، خانەنشینان، خوێندکاران بێ پشتوپەنا دەبن"، شنیار ئەنوەر وادەڵێت.

یەکێتی بەهێزترین بڵندگۆی گۆڕانکارییە

کاندیدەکەی یەکێتی بۆ هەڵبژاردنی پەرلەمانی کوردستان ئاماژە بەوەشدەدات: "تەنها یەکێتی بوو کە لەبری کپکردنی ناڕەزایەتییەکان، کاری بۆ جێبەجێکردنی داواکانیان کرد، بەتایبەتی لە سێ ساڵی رابردوو دا یەکێتی رێچکەی پشتیوانیکردنی ناڕەزایەتییەکانی گرتووەتەبەر، ئەمجارە لەگەڵ یەکێتی کە چارەڕوان دەکرێت زۆرینەی کورسییەکانی پەرلەمان بەدەستبهێنێت".

"یەکێتی لەگەڵ خەڵک و مووچەخۆرانە نەک دژیان بێت، لەگەڵ کوردانی پارچەکانی دیکەیە نەک دوژمنیان بێت، یەکێتی باشترین و بەهێزترین بڵندگۆی گۆڕانکارییە و شایەنی ئەوەیە هەموومان دەرفەتی ئەوەی پێ بدەین ببێتە زۆرینە و حکومی هەموو کوردستان بکات"، شنیار ئەنوەر وادەڵێت.
PUKMEDIA